1002
Бурхан багшын номой хүрдэ анхан эрьюулһэн үдэр – зунай адаг улаагшан Хонин һарын 4-дэ Буддын шажантанай заншалта Сангхын бүхы дасангуудта ерээдүйн Бурхан багша – Майдари бурханай хурал үнгэргэгдэдэг. Мүнөө жэлдэ энэ үдэр 7 дугаар һарын 27-до, гарагай 5-да, Пүрбэ үдэртэ тудаба. Бэшүүр аймагай Шэбэртын дасанда Майдари хуралай үнгэрһэн тухай Дабаатын соёлой байшанай хүдэлмэрилэгшэ, “Баян” ТОСой түрүүлэгшэ Оюна Дубданова манай сурбалжалагшада хөөрэбэ.
- Хорин жэлэй саана Амгаланта нютагтамнай түрүүшын субарга Дашиева Жугдэрма Дашиевнагай оролдолгоор бүтээгдэжэ, рамнайлагдаа һэн. Тиихэдэ үшөө һурагша ябаһан би нютагтамнай үшөө ехэ дасан бүтээгдэхэ байха гэжэ һанагша һэм. Тиигэһээр Шэбэртэдэмнай нютагай зон ехэ дасан бодхоогоо. Жэл бүри Даша-Һүндэблинг хиидтэмнай эгээл ехэ хуралнуудай нэгэн Майдари хурал һүр жабхалантайгаар үнгэргэгдэдэг. Манай Дабаата нютагай зон Шэбэртын дасанай гол жиндагууд юм. Хүндэтэ ламанараа, мүргэлшэдые, тамиршадые халуухан сайгаар, эдеэ хоолоор ханганабди. Дабаатымнай зон шуран бэрхэ, бүхы юумые болохо тээшэнь бүтээдэг юм. Нютагаархинаа һайнаар хүндэлһэн арадай һунгамал Дынчигма Дагбаевада, “Хайранга” ТОСой түрүүлэгшэ, Дабаатын эхин һургуулиин багша Нина Намдыковада, энэ ажал урматайгаар ябуулһан басагад, бэреэдүүдтэ, Дабаатынгаа бүхы зондо бүхы һайн һайханиие, элүүр энхые хүсөөд, буянтнай арьбажажал байг лэ даа гэжэ үреэнэб.
Дасанай шэрээтэ Данзан амбайн, Батор, Алдар, Этигэл амбайнарай хуралайнгаа уншалгые дүүргэхэдэ, найр наадан заншалта ёһоороо мори урилдаагаар эхилээ. Дабаатын Сергей Чимтовай КФХ-гай Карий гэһэн хүлэгөөр Баир Цыбиков түрүүлээ. Орлик морёор Михаил Паньков хоёрдохи, 68 наһатай Юрий Мункуевич Шагжиев Пилот морёороо гурбадахи ерээ.
Һур харбалгаар нэгэдэхи һуури Гутайн Солбон Бадмаев абажа, хонин шагналда хүртөө. Энэл нютагай Зоригто Тубанов хоёрдохи шан абаа. Шанагын Эрдэм Цыбенов гурбадахи һуурида гараа.
Шатараар Бато Цыбенов Владимир Доржиев хоёр эрхимлээ.
Хүл бүмбэгөөр Шэбэртэ нютагай хүбүүд шалгаржа, хони шүүгээ. Аймагай түбэй хүбүүд - 2-дохи, хонхолоорхин 3-дахи һууринуудые эзэлээ.
Гар бүмбэгөөр эрэшүүлэй дунда А.В. Будаев ИП-гэй команда илажа, хонин шагнал абаа. 2-дохидо – Шэбэртын, 3-дахида Бодонгуудай бүлгэмүүд гараа. “Шэбэртэ-1” командын эхэнэрнүүд хонин шагнал абаа. “Шэбэртэ-2” команда 2-дохи һуури эзэлжэ, шанаагаархин 3-дахида гараа.
Барилдаанай баруун гар барижа илаһан Шэбэртын Буян Будаев хониндо хүртөө. Майдари хуралай абарга боложо тодорһон Очир Очиржапов баһал хонин шагнал абаа.
Бүхы мүрысөөнүүдые залан хүтэлбэрилжэ, бүхэ барилдаагаар Цырендондок Зандраев Амгалан Будаев хоёр шүүгшэд байгаа, һур харбалгаар – Мария Цыренжапова, мори урилдаанда Алексей Цыбенов байгаа.
Мүрысөөнүүдэй боложо байхада, сугларһан зондо “Аянга” ансамблиин Сэржэн Эрдынеева, Баярма Содномова, хүүгэдэй сэсэрлигэй «Ая ганга» бүлэгэй хүүгэд ирагуу дуунуудаа, согтой хатарнуудаа дурадхаа. Дуунай, шүлэгэй урилдаануудта Лера Голованова, Лиза Басанова, Алтана Батуева, Туя Раднаева. Лера Султумова, Саша Чемитова, Зоригто Базаров, Адиса Батуева гэгшэд ехэ эдэбхитэйгээр хабаадаа. Нютагаймнай ирагуу найрагша Цыденжап Цыриторон шүлэгүүдээ уянгатуулаа. Яруунаһаа бууһан айлшан Оюна Цыденова уран гоёор «Мүшэн», «Ая ганга», «Минии нүхэд – минии амида бурхад» шүлэгүүдые уншаа. Булта хабаадагшад мүнгэн шангуудаар урмашуулагдаа.
- Майдари хурал үнгэргэлгэдэ хандиб үргэһэн, найрай мүрысөөнүүдтэ туһа хүргэһэн дэлгэр гартай, буян хэшэгтэй зондоо үнэн зүрхэнэй баяр хүргэнэбди: Арадай Хуралай һунгамал Валерий Доржиевич Пурбуев, нютагтаа ажахытай Баир Батоевич Цыбенов, Елена Эрдынижаповна Аюшеева, Бато Булатович Улзытуевай бүлэ, Зоригто Очирович Тубанов, Алексей Алексеевич Цыбенов, Данзан Цыренович Бадмаев, Дамба Цыденович Цыбикжапов, Баир Батоевич Цыренов, Станислав Александрович Ванчугов, Баир Фёдорович Бадмаев, Амгалан Владимирович Будаев, Бадма Цыренович Бадмаев болон Шэбэртын захиргаан (Цырен-Дондок Цыдыпович Шоймполов), «Улаан хада», «Баян», «Хайранга» ТОСууд.
Ерэхэ жэлэй Майдари хуралда баһал олоороо ерэжэ, буян хуряажа, найр нааданда эдэбхитэйгээр хабаадалсыт гэжэ дабаатаархин уряална. Майдари хуралаа эб хамта һайнаар үнгэргэжэ, урилдаа мүрысөөнүүдтэ эдэбхитэйгээр хабаадаһан бүхы зондо баяраа мэдүүлээд, урма зоригтойгоор урагшаа дабшажа, һанаһан һайхан хэрэгүүдэйнь номуун ёһоор бүтэжэ байхые, олон бэрхэ тамиршадай, алдарта абаргануудай тодорхые хүсэе.
Алексей Цыбеновай гэрэл зураг
Автор: Сэнгэ РИНЧИНОВ
