806
Буряад Уласай Засагай газарай Түрүүлэгшын ниигэмэй хүгжэлтын талаар орлогшын уялгануудые дүүргэгшэ Владимир Матханов Кабанск, Селенгинск һууринуудай эмнэлгын газарта хүрэжэ, Лемасоводо олоор санхатаһан хүнүүдээр уулзаба.
Байгша оной августын хоёрто Байгалай эрьеын Лемасово газарта хизаарламал харюусалгатай “Группа-Дали” бүлгэмэй аяншалгын баазада 77 хүнүүд, тэрэнэй тоодо 66 үхибүүд санхатажа, эмнэлгын газарта ороһон байна. Эндэ Сибириин можо нютагуудай болон Буряад Уласай 290 хүн хатарай фестивальда хабаадажа байгаа. Тэдэнэй 200-ниинь үхибүүд юм.
Энэ болоһон ушараар Буряад Уласай Засагай газарта онсо байдалай талаар комисси байгуулагдажа, аяншалгын комплексдо мэргэжэлтэд ошоһон байна.
“Буряад Уласай Толгойлогшын даабаряаар эмнэлгын газарта ороһон хүнүүдээр уулзажа, юун хэрэгтэйб, ямар туһа хүргэхөөр бэ гэжэ мэдэбэбди. Бултандань эмнэлгын туһа хүргэгдэнэ. Тиихэдэ үхибүүд аргалагдажа, гэртээ бусана. Тэдэнэй гэртэхинтэйнь холбоо баринабди. Улаан-Үдэ, Эрхүү хотонуудта үхибүүдые хүргэхэ унаа тухай хэлсэгдэнэ”, - гэжэ Владимир Матханов хэлэбэ.
Буряад Уласай Засагай газар болон Роспотребнадзорой мэргэжэлтэд үхибүүдэй эдэгэжэ, гэртэ бусаха талаар ажал ябуулна.
“Хуули сахидаг албантай суг ажалланабди. Мүрдэлгэ эхилжэ, аяншалгын баазада олон хүнүүдые угтажа, тэдэнэй бэе тамирта хохидол үзүүлһэн гэмтэд элирүүлэгдэхэ. Тэдэнэр заатагүй хуулиин ёһоор харюусаха”, - гэжэ Буряад Уласай Засагай газарай Түрүүлэгшын ниигэмэй хүгжэлтын талаар орлогшын уялгануудые дүүргэгшэ тэмдэглэбэ.
Кабанск аймагай түб больницын таһаг болохо, Сэлэнгын эмнэлгын газарай даагша Ольга Тугариновагай хэлэһээр, тэндэ ороһон 39 үхибүүд болон 7 томошуул эдэгэжэ байна.
Тиихэдэ Буряад Уласай Толгойлогшын уялгануудые дүүргэгшэ Алексей Цыденов Улаан-Үдын Уласай клиническэ инфекционно больницын эмшэд болон үхибүүдээр уулзаба.
Роспотребнадзорой уласай хүтэлбэриин мэдээгээр аяншалгын комплексдо эдеэ хоол, уһа болон эдеэ хоол бэлдэгшэдые шалгаха талаар ажал ябуулагдана. Мүнөө үедэ энэ бааза хагданхай, тохёолдоһон байдалаар дансанууд бэлдэгдэжэ, сүүдтэ оруулагданхай.
