687
Буряад Уласай Толгойлогшын уялгануудые дүүргэгшэ Алексей Цыденов Хурамхаан аймагта ТОСуудай эдэбхитэдтэй уулзаба.
Хурамхаан аймагай ажаһуугшад хүдөө нютагуудта тамирай томо байшан бариха тухай хэлэбэ. Энэ барилгада уласай бюджетһээ11 млн түхэриг гаргашалагдаха, тиихэдээ һургуулинууд спортзаалнуудтай болохо һэн. Энэ асуудалаар Буряад Уласай Засагай газарта 2018 ондо зүбшэн хэлсэгдэхэ гэжэ уласай хүтэлбэрилэгшэ хэлэбэ. Харин мүнөө дээрээ һургуулинууд болон хүүгэдэй сэсэрлигүүд дуталдана гэжэ Алексей Цыденов тэмдэглэбэ.
«Гурбатайһаа долоо наһатай болотор 1900 үхибүүд мүнөө жэлдэ хүүгэдэй сэсэрлигтэ орохогүй. Һургуулинуудта үхибүүд гурбан ээлжээндэ һурана. 3-дахи ээлжээн үдэшын 17 сагта эхилжэ, 21 сагта дүүрэнэ. Мүнөө дээрээ эдэ асуудалнууд шухала. Харин хойто жэл тамирай байшан тухай шиидхэхэбди, ажабайдал тогтошоно бэшэ ха юм», - гэжэ Алексей Цыденов хэлэбэ.
Тиихэдэ нэмэлтэ һуралсалай туршалгын түсэлдэ Буряад Улас ороно гү гэжэ ажаһуугшад асууһан байна. Ородой Холбоото Уласай 22 можо нютагууд, тэрэнэй тоодо Буряад Улас, нэмэлтэ һуралсалай туршалгын түсэлдэ оробо. Хэрбээ уласай болон нютагай засагай байгууламжанууд уялгануудаа дүүргээ һаань, 2018 ондо нэмэлтэ һуралсалда мүнгэн һомологдохо гэжэ Болбосоролой болон эрдэм ухаанай сайдай уялгануудые дүүргэгшэ Баир Жалсанов харюусаба.
Мүнөөдэр Буряад Уласай Толгойлогшын уялгануудые дүүргэгшэ Алексей Цыденов албанай хэрэгээр Хурамхаан аймаг гаранхай гэжэ һануулнабди.
