533
Байгша оной августын 21-25-най үдэрнүүдтэ Улаан-Үдэдэ дабһатай уһатай нуурнуудые шэнжэлхэ талаар Уласхоорондын 13-дахи хуралдаан дэлхэйн 15 гүрэнүүдэй эрдэмтэд сугларха.
Энэ хэмжээ ябуулга дабһатай уһатай нуурнуудые шэнжэлдэг уласхоородын бүлгэм (ISSLR), Красноярск, Улаан-Үдэ, Шэтэ хотонуудай эрдэмэй академиин дээдэ һургуулинууд болон Буряадай гүрэнэй дээдэ һургуули эмхидхэнэ. Тиихэдэ Буряад Уласай Засагай газар болон Ородой Холбоото Уласай гидробиологиин олониитын дэмжэлгээр хуралдаан үнгэргэгдэхэ. Ородой Холбоото Уласай эрдэмэй академиин Сибириин таһагай юрэнхы болон туршалгын биологиин институдай захирал - хуралдаанай эмхидхэлэй хорооной түрүүлэгшэ юм. Тэрэнтэй хамта Буряад Уласай Болбосоролой болон эрдэм ухаанай сайдай уялгануудые дүүргэгшэ Баир Жалсанов, Буряадай гүрэнэй дээдэ һургуулиин захирал Николай Мошкин гэгшэд хабаадалсаха.
2017 оной августын 21-дэ үглөөнэй 10 сагта Бурядай гүрэнэй дээдэ һургуулида хуралдаан эхилхэ юм. Тус хэмжээ ябуулга англи хэлэн дээрэ эмхидхэгдэхэ.
- Уларилай хубилжа байһан үедэ, байгаалида хүнэй үзүүлдэг нүлөө ехэ боложо, хужартай уһатай нуурнуудые шэнжэлхэ шухала. Тиимэһээ хуралдаанда хужартай болон сэбэр уһатай нуурнуудые, тэдэнэй экосистемэ шэнжэлхэ, нөөсэнүүдые зүбөөр ашаглаха тухай хэлсэхэбди. ISSLR бүлгэмэй юрэнхылэгшэ, академик Чжен Миянпинай Хитадай содотой уһатай нуурһаа литий үйлэдбэрилһэн технологи мүнөө сагта хэрэгтэй болоод байна. Ушар юуб гэхэдэ, тэрэнэй ашаар литиин сэн үнэгүй боложо, электромобильнуудай худалдаа наймаан хүгжөө, - гэжэ хуралдаа эмхидхэгшэд хэлэбэ.
Дэлхэйн 15 гүрэнүүдэй, тэдэнэй тоодо Австри, Австрали, Аргентина, Бельги, Иран, Испани, Хитад болон бусад гүрэнүүдэй зуун табяад эрдэмтэд Байгалай эрьедэ үнгэргэгдэхэ Уласхоорондын 13-дахи хуралдаанда хабаадаха юм. Ородой Холбоото Уласта дабһатай уһатай нуурнууд эгээл олон юм. Тиимэһээ эрдэмэй шэнжэлхы хүдэлмэри ябуулхада, энэ һалбарида мэргэжэлтэдые бэлдэхэ талаар ехэ аша үрэтэй хэмжээ ябуулга эмхидхэгдэнэ.
Хужартай уһатай нуурнуудые шэнжэлхэ бүлгэм 20 жэлэй саана байгуулагдаһан юм. Энэ асуудалаар уласхоорондын хуралдаан хоёр жэлэй нэгэ дахин эмхидхэгдэдэг. Хаана хуралдаан эмхидхэгдэхэб гэжэ бүлгэмэй хүтэлбэри шиидхэбэри абадаг. 2015 оной элжээтэ суглаанда Ородой Холбоото Уласай хужартай нуурнуудые шэнжэлэн, Улаан-Үдэдэ уласхоорондын хуралдаа эмхидхэхэ гэһэн шиидхэбэри абтаа. Тэрэ шиидхэбэри Ородой Холбоото Уласай Болбосоролой болон эрдэм ухаанай яаман дэмжэһэн байна.
