1022
Буряад Уласай Толгойлогшын уялга дүргэгшэ Алексей Цыденов Сэлэнгэ аймаг мүнөөдэр албанай хэрэгээр гараба.
Уласай хүтэлбэрилэгшэтэй уулзалгын урда тээ Сэлэнгэ аймагай эдэй засагай асуудалнуудаар гулваагай орлогшо Фаина Забелкина сурбалжалагшадтай уулзажа, һүүлэй 9 жэлэй туршада аяншалагшадай тоо арбаар ехэ болоо гэжэ хэлэбэ. 2016 оной туршада аяншалгын хангалга байгуулһан олзын хэрэг эрхилэгшэдэй олзо 200 саяһаа дээшэ болоһон байна. Тиигэбэшье тэдэ эмхинүүд Улаан-Үдэдэ бүридхэлдэ абтаһан байжа, аймагай бюджедтэ татабари ороногүй. Тиихэдэ Суурхайта нуурта уһа оруулхаар болоо гэжэ Фаина Забелкина тэмдэглэбэ.
Аймаг дотор аяншалгын хүгжэбэл, бюджет болон ажаһуугшадта аша үрэтэй байха гэжэ ойлогонобди, Суурхайта нуурта аяншалгын кластер байгуулхада, 400 сая мүнгэн хэрэгтэй гэжэ гулваагай орлогшо тэмдэглэбэ.
«Аяншалгын кластерэй түсэлөөр инженернэ болон транспортын хангалгын байгууламжа хэгдэхэ болоно. Энээниие бэелүүлгэдэ 400 саяһаа дээшэ мүнгэн хэрэгтэй. 2008 онһоо эхилжэ, Суурхайта нуурай хангалгын байгууламжада 1,6 миллиарл түхэриг һомологдоһон байна гэжэ тэмдэглэлтэй. Мүнөө нуурай эрьедэ дүшөөд амарха баазанууд бии, тэндэ 1700-гаад хүнэй багтахаар юм. Тиихэдэ ганса дулаанай сагта бэшэ, харин түхэреэн жэлэй туршада аяншалагшадые угтан байха гэжэ зорилго мүнгэ һомологшодто табинабди», - гэжэ Фаина Забелкина хэлэбэ.
Гулваагай орлогшын хэлэһээр, 2016 онһоо эхилжэ, Сэлэнгэ аймагта 86 мянган хүнүүд аяншалһан байна. Арбан жэлэй саана тэдэнэй тоо оройдоол найма мянга тухай бологшо һэн.
«Эдэ жэлнүүдтэ аяншалгын олон замуудые байгуулаабди. Ородой Холбоото Уласай сэрэгэй-Эсэгэ орондоо дуратайшуулай аяншалгын замуудай суглуулбарида Буряад Уласай «Селенгинский острог. Минуты памяти и славы» аяншалгын зам ороһон байна.Сэлэнгэ мүрэнһөө Байгал далайда урадхуулаар хүрэхэ зам бии. Новоселенгинск һууринай декабристнуудай музейдэ квестнүүдые үнгэргэдэгбди», - гэжэ Фаина Забелкина хөөрэбэ.
Суурхайта нуурай уһанай шанар муудана. Тэрэниие тойроод байһан нуурнууд өөһэд дундаа багахан голнуудаар холбогдонхой. Суурхайта нуур дахинаа тэдэнтэй холбобол, уһаниинь шэнэлэгдэхэ һэн гэжэ Сэлэнгэ аймагай гулваагай эдэй засагай асуудалнуудаар орлогшо хэлэбэ.
