730
Буряад Уласай «Бурятрегионавтодор» эмхиин туршалгын лабораторидо харгы барилгада хэрэглэгдэдэг асфальт, элһэн, бутархай шулуу шэнжэлдэг юм.
Болзортоо харгы заһабарилгын ажалнуудые дүүргэжэ, тэдэниинь һайн шанартай, техническэ эрилтэнүүдтэ таараһан байха ёһотой гэжэ харгы заһабарилха эмхинүүд хэлсээ баталдаг юм. Буряад Уласта харгын шанар шалгадаг гүрэнэй хоёр эмхинүүд бии. Тэдэнэй нэгэниинь «Бурятрегионавтодор» эмхиин мэдэлдэ юм.
«Харгы заһабарилгын һайн шанартайгаар хэгдэхын тула асфальтобетон шалгагдаха ёһотой. Тэрэнэй шанар лабораторидо шалгагдадаг. Тиимэһээ барилгын алибаа нэгэ шатада хэгдэһэн алдуунууд элирүүлэгдэхэ аргатай», - гэжэ «Бурятрегионавтодор» эмхиин хүтэлбэрилэгшын орлогшо, ахамад инженер Игорь Петров хэлэбэ.
Хэгдэһэн харгын асфальтбетоноор хушагдаһанай һүүлдэ нэгэ хоноод - халуун асфальт, 15 хоногой удаа – хүйтэн асфальт харгын нэгэ модоной зайһаа гурбан газарта хэһэгүүд абтажа, лаборатори асарагдадаг юм. Удаань тэрэ хэһэгүүдые тусхай формонуудта хэжэ, тэдэнэй хэр бүхэ, уһанһаа хохидоно гү гэхэ мэтые шалгадаг байна.
- Харгы заһабарилгада хэрэглэгдэдэг зүйлнүүд нормативна нэгэ хэбтэ тааруу байха ёһотой. Бутархай шулуу, асфальтобетон тусхайтаар шалгажа, тэрэнэй шанар элирүүлдэгбди, - гэжэ лабораториин дарга Татьяна Пискунова тэмдэглэбэ.
Асфальтобетонһоо гадуур харгы заһабарилгада хэрэглэгдэдэг битум баһал шалгагдадаг юм.
- Техническэ эрилтэнүүдтэ харгын заһабарилга тааруу бэшээр хэгдэһэн байгаа һаа, энэ ажал хэһэн эмхи харгы шэнээр хушаха ёһотой. Харгы заһабарилагшадай арсаа һаань, баталһан хэлсээн хүсэгүй болохо аргатай. Юундэб гэхэдэ, харгы заһабарилгын ажалнуудай хэгдэжэ, шалгалта үнгэргэгдэһэнэй удаа харгы заһабарилагшадта мүнгэниинь түлэгдэдэг. Тиихэдээ тэдэнэр асфальтобетоной түлөө - таба, газарай хушалтын түлөө найман жэлэй туршада харюусаха, - гэжэ Игорь Петров хэлэбэ.
Буряад Уласта «Аюулгүй, һайн шанартай харгынууд» гэһэн түсэл бэелүүлэгдэнэ гэжэ һануулнабди. 2017, 2018 онуудта Улаан-Үдэдэ болон хото шадарай аймагуудта харгы заһабарилгада 2,5 миллиард мүнгэн һомологдоһон байна. Тиихэдэ 1,25 миллиард түхэриг федеральна бюджетһээ гаргшалагдаа. 2017 ондо «Аюулгүй, һайн шанартай харгынууд» гэһэн түсэлөөр Улаан-Үдэдэ, Загарай, Ивалга, Тарбагатай болон Байгал шадарай аймагуудта 64 харгы заһабарилагдаха юм.
