805
Ородой Холбоото Уласай Болбосоролой һалбари хинадаг федеральна албанай хүтэлбэрилэгшэ Сергей Кравцов мүнөөдэр Буряад Улас албанай хэрэгээр ерэбэ.
Сергей Кравцов багшанарай августын хуралдаанда хабаадаба.
«Улаан-Үдэдэ болон Буряад Уласай аймагуудай һургуулинуудта шэнэ түсэлнүүд бэелүүлэгдэжэ, тэрэ дүй дүршэлынь гүрэн дотор болбосоролой һалбарида хэрэглэгдэдэг. Тиихэдэ үндэр амжалтануудые туйладаг багшанар дүй дүршэлөөрөө хубаалдажа, шэнэ юумэ нэбтэрүүлгын хүдэлөөн эндэ эдэбхитэй эмхидхэгдэдэг һэн. Болбосоролой һалбарида улас урагшатай хүгжэнэ», - гэжэ Сергей Кравцов хэлэбэ.
9-дэхи классай гүрэнэй шалгалта тушаахаһаа урид, һурагшад аман хэлэлгээр экзамен бариха тухай дурадхал оруулагдана. Тиихэдээ энэ шалгалта һайн дураараа тушааха юм. Гүрэнэй ниитэ нэгэ шалгалтада хубилалтанууд оруулагдагүй гэжэ Болбосоролой һалбари хинадаг федеральна албанай хүтэлбэрилэгшэ Сергей Кравцов тэмдэглэбэ.
«Байгалай болбосоролой бага хурал» дахинаа һэргээгдэхэ. Ородой Холбоото Уласай можо нютагуудай болбосоролой һалбариин түлөөлэгшэд энэ хэмжээ ябуулгада эдэбхитэйгээр хабаададаг байгаа. Һуралсалай программын хүгжэлтэдэ ехэ удха шанартай хэмжээ ябуулга һэн. Тиихэдэ бага хуралай үнгэргэгдэдэг газаршье удха шанартай. Буряад Улас онсо шухаг газар юм. Ондоо можо нютагуудай түлөөлэгшэд уластай танилсажа, федеральна хэмжээндэ шиидхэхээр асуудалнуудаар зүбшэхэ аргатай ха юм», - гэжэ Болбосоролой һалбари хинадаг федеральна албанай хүтэлбэрилэгшэ хэлэбэ.
Тиихэдэ үндэр сайд һургуулинуудай барилга тухай хэлэһэн байна.
«Ородой Холбоото Уласай Болбосоролой болон эрдэм ухаанай яаманда һургуулинуудые барилгын программа бэелүүлэгдэдэг. Һүүлэй жэлнүүдтэ Ород гүрэндэ үхибүүд олоор түрэгдэнэ. Табан жэлэй сада тээхи байдалтай жэшэбэл, мүнөө хоёр дахин олон үхибүүд нэгэдэхи класста ороно. Һургуулинууд дуталдана, тиигэбэшье асуудал шиидхэгдэнэ», - гэжэ Сергей Кравцов хэлэбэ.
Хубиин олзын хэрэг эрхилэгшэдтэй суг ажаллаха
Буряад Уласай Толгойлогшын уялга дүүргэгшэ Алексей Цыденов улас дотор һургуулинууд болон хүгэдэй сэсэрлигүүдэй дуталдаха талаар асуудал яажа шиидхэгдэнэб гэжэ хөөрэбэ.
«Манай һургуулинуудта үхибүүд гурбан ээлжээндэ һурана, хүүгэдэй сэсэрлигтэ орохо үхибүүд ээлжээндэ баһал олон. Байгша ондо Буряадта дүрбэн һургуулинууд нээгдэхэ, хоёрынь –Улаан-Үдэдэ, нүгөө хоёрынь – аймагуудта. Теэд һургуулинуудай дутагдалай асуудал энээгээр шиидхэгдэнэгүй. Ородой Холбоото Уласай Болбосоролой болон эрдэм ухаанай яаманда һургуули барилгада мүнгэ һомолсохо тухай мэдүүлгэ оруулаабди. Бюджедэй мүнгөөр бүхы асуудалнууд шиидхэгдэхэгүй гэжэ ойлгонобди. Тиимэһээ гүрэнэй болон хубиин талаһаа суг ажал ябуулха талаар хаража үзэнэбди. Жэшээнь, мүнгэ һомологшо өөрын мүнгөөр барилга хэхэдэнь, тэрэнэй түлөө түлбэрииень гүрэн 5-10 жэлэй туршада түлэхэ. Энээнэй ашаар жэлдээ нэгэ һургуули бэшэ, харин олон һургуулинуудые бариха аргатай болохобди. Нэгэ доро һуралсалай хэдэн байшангуудые баряад, саашадаа тэрэнэй түлөө түлбэри хэдэн жэлэй туршада түлэхэбди. Хүүгэдэй сэсэрлигүүдэй асуудалнуудаар баһал хубиин олзын хэрэг эрхилэгшэдые һонирхуулха талаар ажал ябуулагдана », - гэжэ Буряад Уласай Толгойлогшын уялга дүүргэгшэ хэлэбэ.
Анна Огороднигой гэрэл зурагууд.
