​Һуралсалай шэнэ жэлдэ Улаан-Үдын һурагшад гурбан ээлжээндэ һураһаар

Тодорхойлбол, Улаан-Үдын 54-дэхи, 8-дахи, 44-дэхи, 63-дахи һургуулинууд гурбан ээлжэээндэ һуралсал үнгэргэгдэхэ юм.

Улаан-Үдын Болбосоролой хорооной түрүүлэгшэ Ульяна Афанасьевагай хэлэһээр, 63-дахи һургуулиин һурагшад һаядаа хоёр халаанда ээлжээндэ һурадаг болохо. 113-дахи кварталда оршодог 63-дахи һургуулида залгалаа байшан баригдажа, ашаглалгада тушаагдахада, байдал хубилха. Тиихэдэ үшөө 740 тухай хүүгэдэй һурахаар шэнэ һургуули баригдажа, ерэхэ жэлдэ тушаагдаха түсэбтэй. Харин бэшэ һургуулинуудай талаар даб дээрээ тодо шиидхэбэринүүд үгы гэжэ тэрэ тэмдэглэбэ. Кабанская, 28 хаягаар баригдажа байтараа орхигдошоһон һургуулииен барилга дүүргэхэ талаар дансанууд бэлдэгдээ. Тиихэдэ Исток һууринда һургуули бариха талаар асуудал хэлсэгдэнэ. 33-дахи гимназида залгажа барилга хэхэ тухай түсэл зүбшэгдэһэн байна. 8-дахи һургуулиин байшан баһал үргэдхэгдэхэ түсэбтэй.

Железнодорожно аймагай 14-дэхи гимназида эрилтын ёһоор 720 һурагшад ном үзэхэ ёһотой аад, үнэн дээрээ хоёр мянга гаран шабинар тэндэ һурадаг. Тиимэһээ Пушкинай гудамжада оршодог коррекционно һургуулиин байшан гимназида үгтэжэ, заһабарилгын ажал хэгдэхэ.

Дээрэ хэлэгдэһэн һургуулинуудһаа гадна бусадшье һуралсалай гуламтанууд эрилтэнүүдтэ тааранагүй. 19-дэхи, 25-дахи, 49-дэхи, 32-дохи һургуулинуудта мүн лэ залагалаа байшангууд баригдахаар гэжэ Ульяна Афанасьева хэлэбэ.

Жэл бүри ниислэл хотын һургуулинуудта һураха хүүгэдэй тоо олошорно. Байгша ондо нэгэдэхи ангида 7500 гаран хүбүүд, басагад оробо. 2016 онтой жэшэбэл, 370 хүнөөр олон болоһон байна. Бүхыдөө жэл бүри һурагшадай тоо хоёр мянгаар дээшэлнэ, харин байгша ондо һурагшадай тоо гурбан мянгаар олон болоо.