​Буряад Уласта буян үйлэдэлгын хэмжээ ябуулга үнгэргэгдэбэ

Ородой Холбооной хүүгэдэй жасын Буряадай таһаг «Һургуулиин сүүмхэ - 2017» гэһэн буян үйлэдэлгын хэмжээ ябуулгын дүн согсолбо.

Олон хүүгэдтэй ба түлюур байдалтай бүлэнүүдэй хүүгэдые һургуулида бэлдэхэдэнь туһа хүргэхэ гээшэ тус хэмжээ ябуулгын гол зорилго болоно.

Сентябриин нэгэн гээшэ тон гоё һайндэр гээшэ, харин зарим түлюур, олон хүүгэдтэй айл бүлэнүүдэй үхибүүдээ һургуулида түхеэрхэ шадалгүй дээрэһээнь иимэ акци эмхидхэгдэнэ.

Мүнөө жэлдэ 40 хүүгэд энэ хэмжээ ябуулгын ашаар туһаламжада хүртэбэ. Гадна түймэртэ хохидоһон Загарай аймагай 3 бүлэнүүд мүн лэ энэ тоодо оролсобо. Сүүмхэ, бэшэгэй болон бусадшье хэрэгсэлнүүд хүүгэдтэ дамжуулагдаба.

Тус жаса «Һургуулиин сүүмхэ - 2017» гэһэн акциһаа гадна уласхоорондын «Панда» гэһэн түсэл дээрэ хүдэлнэ.Тус түсэлэй хэмжээндэ «Верим в тебя» гэһэн тэдхэмжэ үзүүлгын стипендиальна шэглэлээр ажал ябуулагдадаг юм. Тиигэжэ тамирай, эрдэмэй, урлагай, ниитын хүдэлмэриин талаар амжалта туйлаһан хүүгэдтэ дэмжэлгэ үзүүлэгдэнэ.