1006
2017 ондо Улаан-Үдын түмэр замай вокзал заһабарилга эхилһэн юм.
Улаан-Үдын вокзалай һэльбэн шэнэдхэлгэдэ 560 сая түхэриг һомологдохо байһан аад, заһабарилгын түсэбүүд хубилжа, 1,5 дахин ехэ мүнгэн гаргашалагдаха. Заһабарилгын ажалнууд табан шатаһаа бүридэхэ, тиихэдээ хушалта, хүлеэлгын, амаралгын танхимууд, техническэ байшангууд һэльбэн шэнэдхэгдэхэ.
«Вокзалай заһабарилга мүнөө жэл эхилжэ, 2019 ондо дүүргэхэ түсэбтэйбди. Һэльбэн шэнэдхэлгын ажал ябуулхадаа, түмэр замай харгыда ажаһуугшадта туһаламжа үзүүлэгдэжэл байха», - гэжэ Зүүн Сибириин түмэр замай харгын захирал Василий Фролов хэлэбэ.
Улаан-Үдын түмэр замай харгын вокзалда заһабарилгын ажалнуудые үнгэргэхэдөө, үндэһэтэнэй шэмэглэл хэрэглэгдэхэ гэжэ Буряад Уласай Толгойлогшын уялга дүүргэгшэ Алексей Цыденов тэмдэглэбэ.
«Урид бэелүүлэгдэһэн заһабарилгын түсэл зохидхоншье һаа, үндэһэтэ арадай шэмэглэл хэрэглэгдээгүй байгаа. Буряад Уласай Засагай газарай түлөөлэгшэдэй хандаһанай удаа, шэмэглэгдэһэн юм. Биледүүдые худалдаха танхим банкнуудта шэнгеэр электронно бэшэлгээр угтаха. Тусхай номертой байхадаа, ажаһуугшад хайшаа хандахаяа мэдэхэ», - гэжэ түмэр замай харгын вокзалнуудай захиралнуудай эмхиин дарга Виталий Вотолевский хэлэбэ.
Зайн гал гамтайгаар хэрэглэхэ технологи, харгыда ябагшадта мүнөө үеын эрилтэнүүдтэ таараһан дохёо дуулгаха хэрэгсэлээр вокзал хангагдаха. Эрэмдэг бэетэй зондо һаадгүй оршон байгуулха талаар байдал түхеэрэгдэхэ. Нэрлэбэл, налгай харгынууд, лифтнүүд болон тусхайтаар хангагдаһан амарха танхимууд гэхэ мэтэ.
