695
Мүнөөдэр, сентябриин 6-да, Улаан-Үдэдэ Бүхэроссиин арадай фронт можо хоорондын хуралдаа эмхидхэбэ. Энэ хэмжээ ябуулгада Сибириин болон Алас Дурна зүгэй федеральна тойрогуудай 21 можонуудай түлөөлэгшэд хабаадаха.
«Ородой Холбоото Уласай 85 можо нютагуудта экологиин талаар тохёолдоһон байдал тухай үнгэргэгдэһэн хураладаануудта һанамжануудаараа хубаалдаһан байна. Бүхэроссиин арадай фронтын эдэбхитэд байгаали хамгаалгада анхаралаа хандуулдаг. 2015 онһоо хойшо Ород гүрэн дотор энэ һалбарида 130 миллиард түхэригэй гэмтэ ушаралнууд элирүүлэгдэһэн байна», - гэжэ Бүхэроссиин арадай фронтын саг үргэлжэ олониитэ адаглан шалгажа байдаг түбэй залан хүтэлбэрилэгшэ Владимир Гутенев хэлэбэ.
Буряад Уласта байгаали хамгаалгын асуудалнууд шухала асуудалнуудай нэгэн гэжэ Гүрэнэй Дүүмын һунгамал Николай Будуев тэмдэглэбэ.
«Эмхидхэгдэһэн хуралдаан бүхэн шухала асуудалнуудые шиидхэхэ, хүгжэхэ талаар түлхисэ болодог», - гэжэ Николай Будуев хэлэбэ.
Хуралдаан байгаали хамгаалгын талаар дүрбэн шэглэлээр ажалаа ябуулха юм. Энэ хэмжээ ябуулгада Буряад Уласай Толгойлогшын уялга дүүргэгшэ Алексей Цыденов хабаадалсаха түсэбтэй.
Сибириин болон Алас Дурна зүгэй федеральна тойрогуудта бог шорой яажа усадхагданаб гэһэн шалгалтын дүнгүүд тухай хуралдаанда хэлэхэ. Тиихэдэ Байгал далай бузарлалга, тэрэнэй харууһата газарай хилэ хубилгаха талаар, «Байгал далай аршалалга» гэһэн федеральна программа яажа бэелүүлэгдэнэб, ойн түймэрнүүд болон ой модо тариха талаар, хото шадар ойн талмайнуудые бага болгогдоһон ушарнууд тухай, хайра гамгүйгөөр модо отологшод тухай асуудалнуудаар энэ хэмжээ ябуулгада хэлсэгдэхэ юм. Федеральна тойрогуудай можо нютагуудай түб шадар ой модоной парк байгуулха талаар хуралдаанда хабаадагшад һанамжаараа хубаалдаха.
