796
Мүнөөдэр Буряад Уласта Монголой генеральна элшэн сайдай зургаанда Арадай Хуралай һунгамал Степан Калмыковто Ородой Холбоото Уласта Монгол гүрэнэй соёлой талаар элшэн гэһэн үнэмшэлгэ баяр ёһололой оршондо барюулагдаба.
Буряадта Монгол гүрэнэй элшэн түлөөлэгшэ Дамдин Чадраабал хуушан монгол хэлэн дээрэ бэшэгдэһэн ёһололой данса уншажа, үнэмшэлгэ барюулһан байна.
- Ородой Холбоото Уласта Монгол гүрэнэй соёлой талаар элшэн гэһэн үнэмшэлгэ Степан Калмыковто барюулнабди. Степан Владимирович олон жэлэй туршада Буряадай гүрэнэй ехэ һургуулиин захирал ябаһан юм. Тиихэдээ тэрэ болбосоролой болон соёлой һалбаринуудта гадаадын харилсаанай ажал ябуулдаг байгаа. Манай буряад, монгол арадууд нэгэ угсаатан, тиимэһээ соёл, ёһо заншалнууднай адли. Хоёр гүрэнүүдэй хоорондо эдэй засагай, соёлой харилсаан үдэрһөө үдэртэ бэхижэнэ. Степан Владимирович саашадаа энэ һалбарида ажалаа үргэлжэлүүлжэ, олон хэмжээ ябуулгануудые эмхидхэхэ гэжэ найданабди, - гэжэ Дамдин Чадрабал хэлэбэ.
Харюудань Степан Калмыков баяраа мэдүүлжэ, саашанхи түсэбүүд тухайгаа хэлэбэ.
- Ород гүрэндэ, имагтал Буряад Уласта Монголой талаһаа ажал ябуулхыем даалгаба. Минии ябуулжа байһан ажал ехэ хубилхагүй. Олон жэлэй туршада мүнөөшье болотор Ородой Холбоото Улас, Монгол гүрэнэй хоорондо эрдэм болбосоролой, спортын, соёлой, залуушуулай бодолгын болон эдэй засагай һалбарида ажал ябуулнаб. Хитад, Монгол болон Ород гүрэнүүдэй хоорондо харилсаа хүгжөөлгын арга боломжонуудые хаража үзэхэ хэрэгтэй. Тиихэдэ Казахстан мүнөө ямар байдалтайб гэжэ хаража үзэхэ. Энэ ехэ һонирхолтой асуудал, - гэжэ Степан Калмыков хэлэбэ.
Буряадай гүрэнэй дээдэ һургуулиин багша Баатар Дагбаевай хэлэһэнэй ёһоор, Степан Владимирович олон жэлэй туршада Буряадай гүрэнэй ехэ һургуулида элдэб тушаалда ажаллаа.
- Степан Калмыков олон бүхэ барилдаашадые бэлдэһэн юм. Тэрэнэй шабинарынь ганса Буряадта бэшэ, харин Ород гүрэнэй можо нютагуудай болон уласхоорондын мүрысөөнүүдтэ түрүү һуури эзэлһэн. Тэдэнэй дундаһаа спортын олон мастернууд урган гараа. Тиихэдэ Степан Владимирович спортын талаар эрдэм болбосорол дэлгэрүүлхэ, бэеын тамирай багшанарые бэлэдхэхэ талаар горитой хубитаяа оруулһан юм. Манай дээдэ һургуулиин оюутад эрдэм шэнжэлгын, тамирай, соёлой талаар Монгол гүрэнтэй ходо харилсажа байдаг, - гэжэ Баатар Дагбаев хэлэбэ.
2015 ондо Ородой Холбоото Уласта Монгол гүрэнэй соёлой элшэн гэһэн үнэмшэлгэ Доржо Сультимовто барюулагдаһан гэжэ тэмдэглэлтэй. Тэрэ Степан Калмыковые амаршалаад, амжалта хүсэжэ, саашадаа суг аша үрэтэйгөөр ажалаа ябуулха тухай хэлэбэ.
Арадай Хуралай олондо мэдээсэл тараадаг хэрэгсэлнүүдтэй ажал ябуулдаг таһагай гэрэл зураг.
