803
Мүнөөдэр, сентябриин 11-дэ, Буряад Уласай Толгойлогшын һунгалтын дүнгүүдые соносхоһон брифингдэ Түнхэн аймагай һунгуулиин нэгэ газарта һунгалтын дүнгүүд хүсэгүйдэ тоологдохо гэжэ уласай һунгуулиин комиссиин түрүүлэгшэ Дмитрий Ивайловский тэмдэглэбэ.
«Холо оршодог бэшэ һэн хойно һунгуулиин газарта болзорһоо урид һунгалта үнгэргэхэ ёһогүй байгаа. Эндэ хуули хазагайруулагдажа, һунгалтын дүнгүүд хүсэгүйдэ тоологдохо. Тиимэһээ эндэхи һунгуулиин комисси тарааха тухай шиидхэбэри абаабди», — гэжэ Дмитрий Ивайловский хэлэбэ.
Уласай һунгуулиин комиссиин түрүүлэгшын хэлэһэнэй ёһоор, эндэ болзорһоо урид хоёр бюллетень абаһан байна. Тиимэһээ һунгаһан 400 хүнэй дуун хүсэгүй болохо. Энэ ушар уласай һунгалтын дүнгүүдтэ нүлөөлхэгүй.
«Ниитэ нэгэ Росси» намһаа дэбжүүлэгдэһэн Алексей Цыденовэй түлөө 260 мянганһаа дээшэ ажаһуугшад, 87,43 хубинь һунгаһан байна. Батодалай Багдаевай түлөө – ажаһуугшадай 5,15 хубинь, Сергей Дорошой түлөө – 4,39 хубинь дуугаа үгөө.
