704
Байгша оной сентябриин 14-дэ Буряадай ниислэл Улаан-Үдэдэ хүүгэдэй сэсэрлигүүдэй хүмүүжэмэлнүүд «Байгаали хамгаалгын үзэглэл» гэһэн уласай хуралдаанай хоёрдохи шатада хабаадаха.
Энэ хуралдаанай түрүүшын шата 2017 оной июниин 1-һээ сентябриин таба болотор заочноор үнгэргэгдэһэн юм. Тэрэнэй дүнгүүдээр 33 хүдэлмэринүүд шэлэн абтагдаһан байна.
Хуралдаанда хабаадагшад огородой эдеэ хоол, сэсэг ургуулга, газар дайда шэмэглэлгэ, байгаалиин харууһатай онсо газарнууд, оршон тойронхи байгаали бузарлалга, хүнүүдэй бэеын тамир, нютагай суута хүнүүд тухай хэлсэхэ. Тиихэдэ хүүгэдэй уран зурагай, байгаалиин зүйлнүүдһээ гар бүтээлнүүдэй мүрысөөндэ хаба шадалаа туршаха юм.
Буряад Уласай ниислэл хотын 15, 58, 95, 111, 112 болон 48-дахи һургуулиин дэргэдэхи хүүгэдэй сэсэрлигүүдэй, Хэжэнгэ аймагай «Жаргал», Зэдэ аймагай «Малыш», Баргажан аймагай «Берёзка», «Тополёк», Аха аймагай «Солнышко», Сэлэнгэ аймагай «Сказка», Загарай аймагай «Колобок», «Тополёк», Кабанск аймагай «Малышка», «Ладушки» болон Хяагта аймагай хүүгэдэй сэсэрлигүүдэй хүмүүжэмэлнүүд хуралдаанда хабаадаха. Хэмжээ ябуулгада илагшад баярай бэшэгүүд болон бэлэгүүдээр шагнагдаха юм.
