​Сониндомнай ерэһэн бэшэг

Мүнөө сагта үсөөн зон саарһан дээрэ бэшэг бэшэдэг. Нэгэ гарай хургаар тоолохоор зон бэшэһэн бэшэгээ конвертдэ хээд, сонинуудай редакцида эльгээдэг гээшэ бэзэ. 

Һунгалтын урда тээхи идхалгын ажалай ябуулагдажа байха үедэ манай редакцида нэгэ хэдэн бэшэг ерээ юм. Хүндэтэ уншагшаднай манай бэшэһэн залуу даргын ажал тухай олон толилолгонуудые шэнжэлэн, шүүмжэлэн һагад уншаад, өөһэдынгөө һанамжа бэшэһэн байгаа. Тиигээд бэшэһэн бэшэгүүдыемнай толилогты гэжэ гуйгаа. 

Хуули хазагайруулхагүйн тула тэдэниие сентябриин 10-ай урда тээ барлагдаһан дугаарнуудта толилжо болохогүй байгаа бшуу. Юундэб гэхэдэ, тэрэ бэшэлгэ, зорюулга дотор Буряад Уласай Толгойлогшын тушаалда кандидат ябаһан Алексей Цыденовтэ шүлэглэмэл зорюулгашье, тэрэнэй түлөө дуугаа үгэхэ тухай сэхэ уряанууд бэшэгдэнхэй байгаа. 

Бэшэгүүдэй авторнуудһаа хүлисэл гуйгаад, һунгалтын иимэ үндэр дүнгүүдтэйгээр үнгэрөө хада, мүнөө бусад уншагшадайнгаа анхаралда толилходошье болохо гэжэ бодообди. 

Захаамин аймагай Утаата нютагта ажаһуудаг ахатан, наһанайнгаа амаралтада гаранхай Борис Гармаев шүлэглэн һагад, иигэжэ бэшэһэн байха юм:

«Аяар холын Москваһаа

Арад зондоо туһатай

Абай Гэсэр баатар мэтэ 

Алексей ерэбэ Буряадтаа. 

Ажал хэрэгээ һэргээжэ, 

Адуу малаа үдхэхэ, 

Агаар, уһаяа сэбэрлэхэ 

Аятай зохид хараатай. 

Хүндэтэ нютагаархин! Буряад Уласай Толгойлогшын уялга дүүргэгшэ Алексей Цыденовтэ сентябриин 10-да дуугаа үгэхыетнай хандагша – пенсионер Борис Гармаев, Захаамин аймаг, Утаата нютаг».