853
Байгша оной сентябриин 15-да Улаан-Үдэдэ «Буряад Уласай багша-психолог -2017» гэһэн уласай түрүүшын мүрысөөнэй хаалгын баяр ёһолол үнгэргэгдэһэн байна.
Багшанарай колледжын байшанда эмхидхэгдэһэн хэмжээ ябуулгада Буряад Уласай Болбосоролой болон эрдэм ухаанай сайдай нэгэдэхи орлогшо Галина Фомицкая, Болбосоролой бодолгын уласай институдай проректор Эржена Цыбикова, аймагуудай болбосоролой эмхи зургаануудай хүтэлбэрилэгшэд, һургуулинуудай захиралнууд сугларжа, мүрысөөндэ хабаадагшадые амаршалба. Гурбан үдэрэй туршада аймагуудай 22 багшанар- психологууд багшалхы дүй дүршэлөөрөө хубаалдажа, хүүгэдэй психологёор мэдэсэеэ шалгажа, мүрысөөндэ хабаадаба. «Визитная карточка», «Нээмэл хэшээл», «Кейсы» гэһэн шатануудта урилдажа, мүрысөөнэй Гран-при шанда болон «Буряад Уласай багша-психолог -2017» гэһэн нэрэ зэргэдэ Х.Намсараевай нэрэмжэтэ Хэжэнгын дунда һургуулиин багша Ирина Кудеринова хүртэбэ. Ирина Кудериновада Буряад Уласай Болбсоролой болон эрдэм ухаанай яаманай тусхай шан, баярай бэшэг, планшет болон мүнгэн шан барюулагдаба.
- 11 жэлэй туршада багша-психолог гэһэн мэргэжэлээр ажаллажа байнаб. Энэ мэргэжэл шэлэһэн хүн нигүүлэсхы сэдьхэлтэй, һайн һанаатай байха ёһотой. Мүрысөөндэ хабаадагшадые халуунаар амаршалжа, бултандань элүүр энхэ, амжалтатай ябахыень хүсэнэб, - гэжэ Ирина Кудеринова баяраа хубаалдаба.
Мүрысөөнэй дүнгүүдээр номинацинуудта шалгарһан багшанар шагнагдаһан байна. "За индивидуальный стиль и нестандартный подход" гэһэн номинацида Буряад уласай үндэһэтэнэй 1-дэхи лицей-интернадай багша Сырен-Дулма Мэдэгэй түрүү һуури эзэлээ. “За оптимизм и активную жизненную позицию”номинацида Ярууна аймагай Нарһатын 1-дэхи дунда һургуулиин багша Екатерина Степанова, "За психологическую культуру и профессиональную компетентность" – Улаан-Үдын коррекционно 2-дохи һургуулиин багша Саяна Даашиева, "За эстетический подход в работе психолога" – Ивалга аймагай Сотниковын дунда һургуулиин багша Виктория Архинчеева,"За инициативность и настойчивость в достижении целей" – Хори аймагай Санномыскын дунда һургуулиин багша Ирина Шурыгина, "За эффективную реализацию идей педагогической психологии в образовательной психологии" – Улаан-Үдын 35-дахи һургуулиин багша Людмила Стрижкова, "За профессиональное мастерство в работе школьного психолога" номинацида Улаан-Үдэ хотын 65-дахи һургуулиин багша Алёна Стрекаловская гэгшэд түрүүлбэ.
- Урагшаа һанаатай багшанарые элүрүүлхэ, гүрэнэй болбосоролой программа бэелүүлдэг, үхибүүдтэй ажал ябуулдаг эрхим мэргэжэлтэд тухай олондо хөөрэхэ, дуулгаха зорилготой иимэ мүрысөөнүүд эмхидхэгдэдэг, - гэжэ Буряад Уласай Болбосоролой болон эрдэм ухаанай сайдай нэгэдэхи орлогшо Галина Фомицкая тэмдэглэбэ.
«Буряад Уласай багша-психолог -2017» гэһэн мүрысөөн манай уласта түрүшынхиеэ үнгэргэгдэбэ. Уласай шатын мүрысөөндэ илаһан Ирина Кудеринова Бүхэроссиин 11-дэхи мүрысөөндэ уласаа түлөөлхэ юм. «Ородой Холбоото Уласай багша-психолог - 2017» гэһэн мүрысөөнэй түгэсхэлэй шата октябриин 10-һаа 20 болотор Сочи хотодо үнгэргэгдэхэ юм.
