966
2017 оной сенятбриин 24-дэ Ивалгын дасанда Пандида Хамба ламын ехэ һургуулиин байгуулагдаһаар 253 жэлэй, Этигэл Хамбын 165 жэлэй болон заларһан үдэрэйнь 15 жэлэй ойн баярта зорюулан Этигэл Хамба ламын найр үнгэргэгдэхэ юм.
Үглөөнэй 8 сагһаа хурал хурагдажа, һүзэгшэд Этигэл Хамбада мүргэхэ. Удаань Ивалгын дасанай тамирай талмайнуудта бүхэ барилдаан, мори урилдаан, һур харбаан, һээр шаалга эмхидхэгдэхэ. Бүхэ барилдаагаар 63 кг, 75кг болон тэрэнһээ дээшэ шэгнүүртэ эрэшүүл барилдаха, тиихэдэ 2005 оной эдир барилдаашад хаба шадалаа мүрысөөндэ туршаха юм.
Энэ хэмжээ ябуулгын үедэ эстрадын болон арадай урлагай бэлигтэн тоглолто харуулха. Буряад Уласай түрүү үйлэдбэринүүд худалдаа наймаа эрхилхэ юм.
«Энэ үдэр Этигэл Хамба ламын һайндэр. Тиимэһээ тэрэнэй адис ехэ шанга, хүсэтэй», – гэжэ Ородой Холбоото Уласай Заншалта Сангхын Пандида Хамба лама Дамба Аюшеев һүзэгтэниие Ивалгын дасан ерэжэ, Этигэл Хамбада мүргэхыень урина.
Этигэл Хамба ламын найрта үнгэрһэн жэлнүүдэй «Этигэл Хамбын наадануудта» илагшад, Пандида Хамба лама Дамба Аюшеевһээ хонин һүрэг абаһан Буряад Уласай, Үбэр Байгалай болон Эрхүү можын 51 һомонуудай хүтэлбэрилэгшэд, Буряад Уласай аймагуудай гулваанарта урилга эльгээгдэнхэй.
Анна Огороднигой гэрэл зураг.
