​Залуу мэргэжэлтэдые дэмжэнэ

Хоёр жэлэй урда тээ Хэжэнгэ аймагай захиргаан багшаар хүдэлхэ гэжэ ерэһэн залуу мэргэжэлтэдые дэмжэхэ гэжэ шиидээ hэн. Тиигэжэ нютагай засаг зургаан залуу багшанарта буряад үүлтэрэй таба-табан хони бэлэглэдэг болоо hэн. 

Харин мүнөө жэлдэ залуу мэргэжэлтэдтэ арба-арбан толгой хонин хубаагдажа, ажалда орогшод газар гэшхэхэ малтай болобо. Иигэжэ Хэжэнгэ аймагай засаг дарга Геннадий Лхасаранов залуу багшанарые дэмжэжэ, урма зоригыень үргэнэ гээшэ. Нютагай зон засаг даргынгаа энэ үүсхэлыень ехэтэ һайшаадаг юм. Засаг даргые дэмжэгшэд – Ородой Адаг нютагай хизаарлагдамал харюусалгатай «ТаВиДа» бүлгэм болоно. Буддын шажанай заншалта Сангхын 24 дүгээр Бандида хамба лама Дамба Аюшеевэй туhаар энэ ажахы бата бэхеэр хүл дээрээ гараһан юм. Табан жэлэй саана аймагай захиргаанай туhаар эндэ буряад үүлтэрэй 215 толгой хонид Мухар-Шэбэр аймагһаа асарагдаа һэн. Мүнөө хонин hүрэгэй толгой нилээд олошороо. Тэдэниие һайнаар ондо оруулхын тула хонишод бэлшээри, сабшалангаа жэл ошохо бүри үргэдхэнэ. 

Бүүбэй үүлтэрэй хонид хурьгадаа үншэрөөдэггүй. Иимэ табан хонитой болоһон айлайхи хэзээшье үгырхэгүй гэлсэдэг. Юуб гэхэдэ, тэдэнь үдэһөөр үдэжэ, олон болодог ха юм. Үбэлэй хүйтэндэ даарахагүй, эдихэ хоолоо туруугаараа сабшажа олодог, бүхэли жэлэй туршада аяараа бэлшэдэг шэрхи амитад лэ даа.

- Иимэ хонидтой болоһон малшад урагшатай байдаг, табан хушуу малаа олон болгоһоор болгодог гээшэ, - гэжэ «ТаВиДа» бүлгэмэй захирал Зориг Нимбуев тэмдэглэнэ. 

Тиигээдшье ниигэмдэ туhалха, хүн зониие дэмжэхэ, урмашуулха зорилготойгоор энэ хонин hүрэг үсхэбэрилэгдэнэ ха юм. Энэ буянтай хэрэг. Буян үйлэдэгшэтэй хэрэг урагшатай байдаг гээшэ. Тиимэһээ «ТаВиДа» бүлгэмэйхид аба эжынгээ буусада бусажа, нютаг нугаяа үргэхэ гэжэ шиидэһэн залуу мэргэжэлтэдые дэмжэхэhээ гадна, мүн нютагайнгаа онсо габьяа харуулһан зондо хони бэлэглэдэг юм. 

Тиигэжэ дүшэн жэлэй хугасаа соо ажалаа амжалтатайгаар ябуулжа байһан болбосоролой ветеран, түүхын багша Светлана Агбановнада мүнөө жэлдэ Болбосоролой яаманай тогтоон байгуулһан «Буряад Уласай болбосоролой хүгжэлтэдэ ехэ хубитаяа оруулһанай түлөө» гэһэн медаль аймагай засаг даргын орлогшо Интерна Ильинична Эрдынеева барюулжа, хонин hүрэгэй эзэд хун сагаан хони бэлэглэбэ. 

Уласай хэмжээндэ амжалта туйлаһан Хэжэнгын хоккейн командын гэшүүн бүхэндэнь аймагай захиргаанай зүгhөө хонин бэлэг үгтэбэ. Ород нютагта эмшэн боложо ерэһэн залуу мэргэжэлтэ мүн лэ арбан хониной эзэн болобо. 

Болбосоролой ветеран, түүхын багша Светлана Агбановнада баһа хонин бэлэг үгтөө 

Хэжэнгэ аймагай захиргаанайхид, "ТаВиДа" бүлгэмэйхид нютагаа үргэхэеэ ерэһэн залуушуулһаа, бүхы наһаараа үнэн сэхээр хүдэлһэн ажалай ветерануудһаа эхилээд, нютагайнгаа нэрэ холо ойгуур суурхуулһан хүнүүдтэ хони бэлэглэдэг һайхан заншалтай юм 

Елена ДАШИДОРЖИНАГАЙ гэрэл зурагууд