735
Буряад Уласай багшанарай колледжын байшанда «Буряад Уласай хүмүүжүүлэгшэ – 2017» гэһэн уласай 5-дахи мүрысөөнэй хаалгын баяр ёһолол үнгэргэгдэбэ.
Тэрэнэй дүнгүүдээр Улаан-Үдын 35-дахи «Алые паруса» гэһэн хүүгэдэй сэсэрлигэй хүмүүжүүлэгшэ Ольга Самбуева Гран-при шанда хүртэбэ.
- Мүрысөөнэй эжэхилхын урда тээ, энэ мүрысөөндэ илабал, юун гэжэ хэлэхэбиб гэжэ бодолгодо абтааб. Харин мүнөө баяртайб, зүрхэм хөөрэнхэй, эсэһэн шэнгиб. Хүүгэдэй сэсэрлигтэ суг хүдэлдэг нүхэдтөө баяраа мэдүүлнэб. Хүн бүхэмнай өөрын өөрсэ маягтай, ондо ондоо хэлэн дээрэ хөөрэлдэдэгбди, тиигэбэшье маанадые нэгэдүүлһэн – хүүгэд, бидэ тэдэнэртэ энхэргэн зөөлөөр ханданабди, багашуулдаа дуратайбди, - гэжэ уласай эрхим хүмүүжүүлэгшэ хэлэһэн байна
Һарын туршада уласай 52 хүмүүжүүлэгшэд мүрысөөндэ хабаадааһан байна. Буряад Уласай Болбосоролой болон эрдэм ухаанай яаманай сайдай орлогшо Галина Фомицкая, Буряад Уласай Арадай Хуралай Ниигэмэй бодолгын талаар хорооной зүбшэлэгшэ Баярма Бадарханова, Буряад Уласай болбосоролой бодолгын институдай захиралай уялга дүүргэгшэ Эржена Цыбикова, Буряад Уласай багшанарай колледжын захирал Светлана Нимбуева, аймагуудай болбосоролой хүтэлбэриин дарганар, хүүгэдэй сэсэрлигүүдэй хүтэлбэрилэгшэд, хүмүүжүүлэгшэд, гэртэхинэй олониитын түлөөлэгшэд тэдэниие амаршалхаяа сугларһан байна.
- Хүүгэдэй сэсэрлигүүдэй ажалшадай үдэрһөө урид зохёохы мүрысөөнэй дүнгүүд согсологдохонь удха шанартай. Энэ мүрысөөн оройдоол 5-дахияа үнгэргэгдэжэ байна. Түрүүшын дүрбэн жэлэй хугасаада 85 хүн эндэ хабаадаа, харин мүнөө жэл 52 хүмүүжүүлэгшэнэр хаба шадалаа туршаба. Мэргэжэл ехэтэй багшанар ганса үхибүүдтэй хамта жал ябуулха бэшэ, харин дүй дүршэлөөрөө гансашье Буряадта бэшэ, тиихэдэ уласһаа гадуур, можо нютагуудай хүмүүжэлэгшэдтэй хубаалдаха арга боломжотой, - гэжэ Галина Фомицкая тэмдэглэбэ.
Буряад Уласай эрхим хүмүүжүүлэгшэ Ольга Самбуева диплом, мүнгэн сертификат болон үнэтэ бэлэгүүдээр шаганадаба. Ольга Самбуева Рязань хотодо үнгэргэгдэхэ «Эрхим хүмүүжүүлэгшэ - 2017» гэһэг Бүхэроссиин мүрысөөнэй түгэсхэлэй шатада уласаа түлөөлхэ юм.
