787
2017- 2018 оной һуралсалай жэлдэ уласай стипендидэ хүртэһэн илагшадые амаршалгын баяр ёһолол сентябриин 27-до үнгэргэгдэбэ.
Буряад Уласай Болбосоролой болон эрдэм ухаанай яаманай сайдай орлогшо Галина Фомицкая, Буряад Уласай Арадай Хуралай Ниигэмэй бодолгын талаар хорооной түрүүлэгшэ Александр Стопичев болон эрхим оюутад баяр ёһололой хэмжээ ябуулгада хабаадаба.
Буряад уласай ехэ һургуулинуудай, дунда мэргэжэлэй болбосоролой һургуулинуудай, Ородой Холбоото Уласай эрдэмэй академиин Сибириин таһагай эрдэмэй институдай эгээл эрхим 29 оюутад нэрээр тэмдэглэгдэһэн стипендидэ хүртэхэ болобо. Тэдэнэр эрхимээр һурадаг, олимпиаданууд, мүрысөөнүүд болон эрдэмэй-практическа хуралдануудта амжалтатайагаар хабаададаг юм.
-Таанадые үнэн зүрхэнһөө амаршалнаб. Саашадаа амжалтатай, шэнжэлхы ажалнуудтнай Ород гүрэнэй болон Буряад Уласай ниигэмэй-эдэй засагай хүгжэлтэдэ удха шанартай байг лэ гэжэ хүсэнэб, - гэжэ Галина Фомицкая хэлэбэ.
Галина Фомицкаягай хэлэһээр, Буряад Уласай Засагай газар 1994 ондо нэрээр тэмдэглэгдэһэн стипенди үгтэжэ эхилһэн байна. 24 жэлэй туршада 700 хүн стипенди абаа. Нэрээр тэмдэглэгдэһэн стипенди оюутадай болон аспирантнуудай абадаг стипендидэ нэмэлтэ түлэгдэдэг. Мүнөө жэлдэ аспирантнуудай абаха стипенди -1800, оюутадай -1200 түхэриг болохо юм. Эрхимээр һурадаг, эрдэмэй арбан нэгэн һалбаряаар амжалтатайгаар шэнжэлхы ажал ябуулдаг оюутад болон аспирантнуудта мүнгэн тэдхэмжэ үзүүлэгдэдэг.
- Маанадай хэһэн шэнжэлэлгэнүүдые дэмжэһэндэтнай баяраа мэдүүлнэб. Манай ажал ганса Буряадта бэшэ, харин бүхы гүрэн түрын ажабайдалда удха шанартай гэжэ найданаб. Химиин эрдэмэй доктор, профессор, минии багша Лариса Доржиевна Раднаева, суг хүдэлдэг нүхэдтөө болон эрдэмэй зүблэлдэ баяр хүргэнэб, - гэжэ Ородой Холбооной эрдэмэй академиин Сибириин таһагай Байгаали ашаглалгын Байгалай институдай аспирант Жаргал Тыхеев хэлэбэ.
Буряад Уласай Болбосоролой болон эрдэм ухаанай яаман техническэ эрдэмэй һалбарида нэмэлтэ гурбан стипенди байгуулха тухай дурадхал оруулба. «Буряад Уласай шагнал болон стипенди» гэһэн хуулида хубилалта оруулха тухай Арадай Хуралай ээлжээтэ 25-дахи сессидэ зүбшэн хэлсэгдэхэ.
