732
«Аюулгүй, һайн шанартай харгынууд» гэһэн түсэлөөр Буряад Уласта Улаан-Үдэ-Загарай гэһэн харгын найман модоной зайда харгы гэрэлтүүлэлгын, ябаган зүргэнүүдые болбосон түхэлтэй болгохо талаар ажалнууд хэгдэбэ.
Харгы зубшаад ажаһуудаг хүнүүдэй шиидхэбэреэр харгын 22-30 дахи модондо заһабарилгын ажалнууд хэгдээ.
«Харгын аюулгүйе сахидаг албанай мэдээсэһээр, харгын гэрэлтүүлгэ, харгы гараха зүргэнүүд, автобусуудай тогтохо буудал үгыһөө боложо, эндэ харгын аюул ушардаг. Тиимэһээ ажаһуугшадай үүсхэлээр энэ харгы «Аюулгүй, һайн шанартай харгынууд» гэһэн түсэлдэ оруулагдаа», - гэжэ Буряад Уласай Транспортын, элшэ хүсэнэй болон харгын ажахы хүгжөөлгын сайд Сергей Козлов тэмдэглэбэ.
Хизаарламал харюусалгатай «Ремстрой» бүлгэм заһабарилгын ажал саг соогоо дүүргээ гэжэ тэмдэглэлтэй.
2018 ондо Загарай аймагта 17 модоной зайда, Улаан-Үдэ-Загарай-Хэжэнгэ-Хори гэһэн уласай харгыда зургаан модоной зайда, Онохой-Загарай-Хэжэнгэ-Новая Брянь-Старая Брянь гэһэн аймагай харгыда 11 модоной зайда харгынууд заһабарилагдаха. 2019-2025 онуудта Загарай аймагта 104 модоной зайда харгы заһабарилгын ажал хэгдэхэ. Тиихэдэ Загарай, Онохой, Дабаата, Эрхирик һууринуудта автомашинын ябадаг харгы заһабарилагдаха.
