807
Бэлиг талаан ехэтэй, хэжэ байһан ажалдаа үнэн сэхээр хандадаг, ургажа ябаа улаан бургааһадай зүрхэ сэдьхэлдэ залиршагүй гал бадараажа, ажабайдалай үргэн харгыда гаргадаг багшанарай аша габьяань сэгнэшэгүй. Болбосоролой һалбариин хүдэлмэришэдэй ажаябуулга үндэрөөр сэгнэжэ, багшанарай һайндэр тэмдэглэгдэдэг.
Багшанарай һайндэр 1965 оной октябрь һарын түрүүшын гарагай нэгэндэ тэмдэглэгдэжэ эхилһэн юм. 1994 он болотор энэ һайндэр хэзээ тэмдэглэхэб гэжэ тодо үдэр гараагүй байһан. 1994 ондо Ородой Холбоото Уласай Юрэнхылэгшын 1961-дэхи «Багшанарай һайндэр тэмдэглэхэ тухай» гэһэн тогтоолоор, октябриин 5-да багшанарай һайндэр тэмдэглэгдэдэг болоо. Тиихэдэ 1994 оной октябриин 5-да ООН-до Бүхы дэлхэйн багшанарай үдэр гэһэн тогтоол абтаһан юм. Багшанарай ажал хүндэшье, хүндэтэйшье. Багшын мэргэжэл хэзээдэшье, ямаршье сагта хэрэгтэй.
2016/17 һуралсалай жэлнүүдэй Буряад тоо баримталгын албанай мэдээгээр, Буряад Уласта 8629 багшанар хүдэлнэ. Тэдэнэй 83 хубиһаа дээшэ эхэнэрнүүд болоно. Эхин болон бэлэдхэлэй классуудай багшанар эгээл олон, тэдэнэй тоо 2648 хүн, харин химиин багшанар оройдоол 219 хүн юм.
- Багшанарай үдэр эгээл дэмбэрэлтэй һайндэрнүүдэй нэгэн. Багшанар үхибүүдые һургажа, тэдэнэй бэлиг талаан дэмжэжэ, далижуулдаг. Багшанар манай гүрэнэй, уласай ерээдүйе байгуулха хүнүүдые хүмүүжүүлдэг. Бүхы багшанарые мэргэжэлтэ һайндэрөөрнь халуунаар амаршалаад, танай буянтай ажалдатнай тэсэбэри, амжалта хүсэнэбди, - гэжэ Буряад тоо баримтын албанай мэргэжэлтэд хэлэнэ.
