618
Буряад Уласай Захаамин аймагта Дүтэлүүр-Санага-Утаата-Далахай гэһэн харгыда Сэхир гол дээгүүр «Платон» гэһэн федеральна программаар хүүргэ баригдаба.
128 метр утатай, түмэр, бетонһоо хэгдэһэн шэнэ хүүргэ аймагай түбһөө холо оршодог Утаата, Далахай нютагуудые Захаамин һууринтай холбобо.
«Энэ хүүргэ аймаг дотор ехэ удха шанартай. Хуушан модон хүүргын һандархада, хоёр мянганһаа дээшэ зон харгыгүй болошоһон байгаа», - гэжэ Буряад Уласай Транспортын, элшэ хүсэнэй болон харгын ажахын сайд Сергей Козлов хүүргэ нээлгын баяр ёһололой үедэ хэлэбэ.
Энэ хүүргэ 2016 ондо баригдажа эхилһэн юм. Барилгын үедэ мүнгэн дуталдажа, хүүргын барилга тогтон алдаа. Буряад Уласай Толгойлогшо Алексей Цыденов федеральна бюджетһээ энэ хэрэгтэ нэмэлтэ мүнгэ һомолжо, хүүргын барилга дүүргэгдээ. Энэ түсэл бэелүүлгэдэ 93,4 сая түхэриг мүнгэн гаргашалагдаа. Хүүргэ барилгада «Платон» гэһэн федеральна программаар болон уласай болон нютагай байгууламжын бюджедүүдһээ мүнгэн һомологдоһон байна.
Тиихэдэ «Платон» программаар Хяагта аймагта хүүргэ баригдажа, тэрэ 2017 ондо нээгдэхэ. Буряад Уласта 900 хүүргэнүүд бии, тэдэнэй олонхинь хуушаранхай. Буряад Уласай Транспортын, элшэ хүсэнэй болон харгын ажахы хүгжөөлгын сайд Сергей Козловой хэлэһээр, харгыгүй болошохогүйн тула, ниигэмдэ удха шанартай хүүргэнүүдые түргөөр һэльбэн шэнэдхэхэ хэрэгтэй.
Тиихэдэ Буряад Уласай Толгойлогшо Зэдэ аймагта мүнөө зун үмхиржэ, хэрэглэгдэхэеэ болиһон хүүргын барилга баһал федеральна программада оруулха тухай хэлэһэн байна. Тэрэнэй барилгада 200 сая түхэриг мүнгэн гаргашалагдаха гэжэ багсаамжалагдана.
«Энэ хүүргын барилгаар түсэлэй-дансануудай ажалнууд хэгдэжэ эхилээ. Удаань барилга-хабсаралга эхилхэ. Иимэ удха шанартай барилгануудые түрүүлэн хэхэбди. Хойто жэлдэ Буряад Уласай Толгойлогшо болон Засагай газар хүүргэнүүдые барилгада мүнгэ һомололгын талаар ажал эршэтэйгээр ябуулха», - гэжэ Сергей Козлов хэлэбэ.
