731
Буряад Уласта хүгжэм заадаг багшанарай дунда Анатолий Андреевэй нэрэмжэтэ «Минии хүгжэм» гэһэн уласай түрүүшын мүрысөөн октябриин 16-18-най үдэрнүүдтэ эмхидхэгдэхэ.
Энэ мүрысөөн Буряадай гүрэнэй ехэ һургуулииин Багшанарай институдта үнгэргэгдэхэ. Бэлиг талаантай хүгжэмэй багшанарые дэмжэхэ, хүгжэмэй болбосоролой һалбарида шэнэ бодол хүгжөөхэ зорилготой энэ мүрысөөн эмхидхэгдэнэ. Багшанар үнгэрһэн сагай, мүнөө үеын хүгжэмэй баялигтай һурагшадые танилсуулжа, хүгжэмэй ашаар үхибүүдые хүмүүжүүлнэ, гоё һайханиие сэгнэжэ һургана ха юм.
«Минии хүгжэм» гэһэн уласай түрүүшын мүрысөөндэ Буряад уласай Бабанта, Баргажан, Ивалга, Аха, Хори аймагуудай болон Улаан-Үдэ хотын хүгжэмэй багшанар хабаадана. Тэдэнэй «Методическа суглуулбаринууд», «Нээмэл хэшээл», «Соёлой-гэгээрэлэй лекци. Түрэл нютагай аялга» гэһэн шатануудта хаба шадалаа туршаха юм. Энэ хэмжээ ябуулгын үедэ мүрысөөндэ хабаадагшад октябриин 16-да семинарта хабаадаха. Октябриин 17-до мүрысөөнэй нээлгын баяр ёһолол үглөөнэй 9 сагта үнгэргэгдэжэ, Анатолий Андреевэй наһанай нүхэр Надежда Галсановна Донсоруноватай хүгжэмэй багшанар уулзаха. Удаань 9.40 минутаһаа эхилжэ, «Нээмэл хэшээл», «Соёлой-гэгээрэлэй лекци. Түрэл нютагай аялга» гэһэн мүрысөөнэй шатануудта багшанар хабаадаха. Октябриин 18-да үглөөнэй 9 сагһаа Буряад Уласай Болбосоролой болон эрдэм ухаанай сайдай уялга дүүргэгшэ болон сэхээтэдэй хабаадалгатай дүхэриг шэрээ эмхидхэгдэхэ. Удаань 10.30 сагһаа зохёохы презентаци, мастер-классууд, дээдэ һургуулинуудай хүгжэмэй багшанарай зүбшэлгэнүүд үнгэргэгдэхэ түсэбтэй. Үдэрэй 13 сагһаа 14 болотор мүрысөөнэй хаалгын баяр ёһолол үнгэргэгдэжэ, эрхим багшанарые шагнаха юм.
Буряад Уласай Болбосоролой болон эрдэм ухаанай яаман, Болбосоролой болон эрдэмэй профсоюзай уласай хороон, «Ассоциация педагогов - исследователей: учителей музыки и музыкальных руководителей» гэһэн уласай олониитын эмхи хүгжэмэй мүрысөө эмхидхэн байгуулаа.
