​Хүгшэн багшанараа хүндэлэн амаршалаа

Үсэгэлдэр Буряадай багшанарай колледждо багшын ажалай ветерануудые Наһажаал зоной болон Багшын үдэрөөр амаршалгын баяр үнгэргэгдэбэ. Эгсэ 25 жэлэй саада тээ Антонина Силкина Зинаида Топская хоёрой эдэбхи үүсхэлээр “Хотын бэшэ багшанарай ветерануудай зүблэл” Улаан-Үдэдэ байгуулагдаһан түүхэтэй. 

Хүдөөһөө ерэһэн ветеранууд олон болоо 

Бүхы наһаараа хүдөөгэй һургуулинуудта хүдэлжэ, наһанайнгаа амаралтада гараһан багшанар үри үхибүүдээ, аша зээнэрээ дахажа, Улаан-Үдэ нүүжэ ерээд, “газар тэнгэри хоёрой хоорондо” байгаа бшуу. Тиимэһээл энэ Зүблэл саг соогоо байгуулагдаһан байна. Теэд мүнөө гэшүүдынь даншье һаа олон болонхой, шэнэ ерэһэн зониие абаха аргагүйбди гэжэ Зүблэлэй түрүүлэгшэ Светлана Очирова мэдээсээ. 

Яаман болон профсоюзай үреэлнүүд 

Буряад Уласай болбосоролой болон эрдэм ухаанай сайдай нэгэдэхи орлогшо Галина Фомицкая, болбосоролой ажалшадай профсоюзай уласай хорооной түрүүлэгшэ Лариса Жанаева гэгшэд ветеран багшанарые халуунаар амаршалаад, Баярай бэшэгүүдые барюулжа, һайхан үреэл табяа. 

1998-2008 онуудаар орлогшо сайдаар хүдэлһэн Евгения Чимитовада Буряад Уласай болбосоролой хүгжэлтэдэ габьяатай байһанай түлөө медаль зүүлгэгдэбэ. Баһал иимэ медаль 1989-2008 онуудаар сайд байһан Сергей Намсараевта (дээрэхи гэрэл зураг дээрэ) барюулагдаа. Сергей Дашинимаевич эб хамта хүдэлһэн багшанарые халуунаар амаршалжа, урагшатайгаар хүдэлжэ ябаһанаа дулааханаар дурсаа. 

Алишье үедэ багшын ажал айхабтар ехэ харюусалгатай, багша хүн ехэ хүндэтэй байһан гэхэдээ, Сергей Дашинимаевич Наран Уласые жэшээлбэ. Наран Уласта - Японидо эгээл хүндэтэй мэргэжэлтэй хүн багша юм. Тиихэдэ эгээл бага үхибүүдтэй хүдэлдэг хүмүүжүүлэгшэд хамагай ехэ салин абадаг гэжэ онсолон тэмдэглээ. Буряад оромнайшье наранай гараха зүгтэ байһан хадаа, баһал багшанараа ёһотоор хүндэлжэ шадаха бэзэбди гэжэ найдажа байһанаа мэдүүлээ. 

Залуушуулай залитай амаршалга 

Намарай наруули үдэр колледжын танхим соо мэргэжэлтэ һайндэрөө угтажа байһан багшын ажалай ветерануудые (нилээн олониинь энэл суута һургуули дүүргэһэнүүд) колледжын уран бэлигтэйшүүл амаршалаа. Колледжын залуу багшанарай “Тэмүүжэн” болон оюутадай “Тэнгэри” бүлэг ирагуу һайханаар дуулажа, бултанай сэдьхэл хужарлуулаа. “Мүнгэн годлинууд” ансамблиин хүнгэн солбон хүбүүд, басагад уян нугархай хатарнуудаараа баярлуулаа. 

Багшын хүнгэн бэшэ ажалда бүхы наһаараа хүдэлһэн ветерануудые амаршалгын үедэ

Багшын үдэртэ зорюулагдаһан тоглолтын үедэ

Сэнгэ Ринчиновэй гэрэл зурагууд