​​Багшын һайн үдэр

Мүнөөдэр Буряадай багшанарай колледждэ багшын ажалай ветерануудые Аха захатанай болон Багшын үдэрөөр амаршалгын баяр үнгэргэгдэбэ. Эгсэ 25 жэлэй саада тээ Антонина Силкина Зинаида Топская хоёрой эдэбхи үүсхэлээр “Хотын бэшэ багшанарай ветерануудай зүблэл” Улаан-Үдэдэ байгуулагдаһан түүхэтэй.

Бүхы наһаараа хүдөөгэй һургуулинуудта хүдэлжэ, наһанайнгаа амаралтада гараһан багшанар үри үхибүүдээ, аша зээнэрээ дахажа, Улаан-Үдэдэ нүүжэ ерээд, “газар тэнгэри хоёрой хоорондо” байгаа бшуу. Тиимэһээл энэ Зүблэл саг соогоо байгуулагдаһан байна. Теэд мүнөө гэшүүдынь даншье һаа олон болонхой, шэнэ ерэһэн зониие абаха аргагүйбди гэжэ Зүблэлэй түрүүлэгшэ Светлана Очирова мэдээсээ.

Буряад Уласай Болбосоролой яаманай орлогшо сайд Галина Фомицкая, Буряадай болбосоролой ажалшадай профсоюзай хорооной түрүүлэгшэ Лариса Жанаева гэгшэд багша ветерануудые халуунаар амаршалжа, Баярай бэшэгүүдые барюулжа, һайхан үреэл табяа. 1998-2008 онуудаар орлогшо сайдаар хүдэлһэн Евгения Чимитовада Буряад Уласай болбосоролой хүгжэлтэдэ габьяатай байһанай түлөө медаль зүүлгэгдэбэ. Баһал иимэ медаль 1989-2008 онуудаар сайд байһан Сергей Намсараевта барюулагдаа. Сергей Дашанимаевич эб хамта хүдэлһэн багшанарые халуунаар амаршалжа, урагшатайгаар хүдэлжэ ябаһанаа дулааханаар дурсаа.

Намарай дулаахан үдэр колледжын танхим соо мэргэжэлтэ һайндэрээ угтажа байһан багша ветерануудые, нилээн олониинь энэл суута һургуули дүүргэһэнүүд, колледжын уран бэлигтэйшүүл амаршалаа. Колледжын залуу багшанарай “Тэмүүжэн” болон оюутадай“Тэнгэри” бүлэг ирагуу һайханаар дуулажа, бултанай сэьхэл хужарлуулаа. “Мүнгэн годлинууд” ансамблиин хүнгэн солбон хүбүүд басагад уян нугархай хатарнуудаараа баярлуулаа.