​Аба эжын буянгаар арад зондоо туһатай

Дэлхэй дээрэ хэдэн мянган мэргэжэл тоологдодог. Теэд бодоод үзэхэдэ, багшын лэ мэргэжэл эгээл хүндэтэй юм. Ямаршье хүн багшын лэ хүсэл оролдолгоор, ашаар наhанайнгаа харгы олоно ха юм. 

Ерэхэ жэлдэ Бэшүүр аймагай суута Шэбэртын һургуули 95 жэлэйнгээ ой тэмдэглэхэ. Эды олон жэлнүүдэй туршада эндэ эрилтэ ехэтэй, сэсэн бэрхэ, үндэр зиндаатай олон багшанар хүдэлһэн габьяатай. Эхэ оронойнгоо түүхын бүхы шатануудта – хамтарал, дайн, һэргээн бодхоолго, хүгжэлтэ, агуу гүрэнэй һандарал, шэнэ гүрэнэй тогтолго, шэнэ ажабайдал эрхилэлгэ – манай багшанар нэгэтэшье тунхарингүй, арад зоноо гэгээрүүлхэ, болбосоролтой болгохо дэмбэрэлтэ ажалаа харюусалгатайгаар ябуулжа, үхибүүдые ажабайдалай үргэн харгыда гаргажал байгаа. 

Һүүлэй жэлнүүдтэ манай һургуули Буряад орондоошье болон Ородой Холбоото Уласта мэдээжэ болонхой. Һурагшадай талаан бэлиг дээшэлүүлхэ зохёохы талмайнууд эндэ хүдэлжэ, hургуулимнай нэгэ сая мүнгэн шанда хүртөө. Ерээдүйдэ һургуули ямар байхаб гэжэ дүй дүршэлөөрөө Буряадайнгаа, хүршэ Үбэр Байгалай хизаарай багшанартай хубаалдана. 

- Эдэ хэмжээ ябуулгануудай гол ажалые, хэрэгтэй саарһа дансануудыень һургуулиин захирал Юлия Шоймполова, тоо бодолгын багша Нимасу Цыбиковатай хамта бүтээжэ байдаг. Буряадай габьяата багша, Ородой Холбооной юрэнхы эрдэмэй хүндэтэ хүдэлмэрилэгшэ Нимасу Данзановнагай наhанайнгаа амаралтада гараһаарнь, бидэ – хамта хүдэлжэ ябаһан багшанар, заалгаһан һурагшадынь, гэртэхинэй эблэл – бүхы һайн һайханиие хүсэжэ, дүрбэн зээнэртээ тулга боложо, арюун заншалаараа хүмүүжүүлжэ, ан-бун ажаһуухыень хүсэнэбди. Бидэ хэзээдэшье танаа хүлеэжэ байхабди, - гэжэ манай штатнабэшэ сурбалжалагша Цырендондок ЗАНДРАЕВ манда бэшэнэ.

Нимасу Данзановна Цыбикова 1954 ондо аглаг һайхан Амгаланта нютагта хуасай hалдайтан омогой ажалша бэрхэ Данзан Раднаевич болон Гутайн Шаан-Добын Дулма Дубдановна Раднаевтанай үнэр баян эбтэй бүлын арбадахи үхибүүниинь боложо түрэһэн юм. Энэ бүлэ гушаад оной шэрүүн сагта сүлэлгэдэ ябуулагдаһан. Нютагаа бусаад, хамтын ажалда эсэшэ сусашагүй ябаа. Хоёр хүбүүд, найман басагадынь бултадаа ажалша бэрхэ, олондо хүндэтэй юм. Нимасу Цыбикова 1975 ондо багшанарай дээдэ һургуули дүүргэһээр, 42 жэлэй туршада нютагайнгаа һургуулида амжалта түгэс хүдэлнэ. 

Нимасу Данзановнагай наһанай нүхэр Булат Ёндонович баһал тоо бодолгын багша, ажал хэрэгтээ ехэл нэтэрүү оролдосотой, урагшаа һанаатай бэлэй. 1999 ондо сагһаа урид наһанһаа хахасаһаниинь гомдолтой, халагламаар юм. Таня, Вика басагадынь багшын ба юристын дээдэ эрдэмтэй. Татьяна Булатовнагай нүхэр Виктор Иванов - олон үүргэ дүүргэдэг түбэй захирал. Тэдэнэр Аюр, Тамир хүбүүдые хүмүүжүүлнэ. Виктория Булатовнагай нүхэр Дмитрий Ширдармаев мүшхэлгын хороондо ажаллана. Тэдэнэй ууган Даниил хүбүүниинь Саша дүүгээ дахуулна. 

Ородой Холбоото Уласай эрхим багшанарай тоодо орожо, мүнгэн шанда хүртэһэн Нимасу Данзановна Цыбикова хэшээлһээ хэшээлдэ, үдэрһөө үдэртэ эрдэмээ дээшэлүүлжэ, мүнөө сагай эрилтэнүүдтэ харюусама шэнэ онол аргануудые хэрэглэжэ хүдэлдэг. Заалгаһан шабинарынь гүрэнэй шалгалтада һайн сэгнэлтэ абадаг, уласай олимпиадануудта нэгэнтэ бэшэ шангай һууринуудые эзэлдэг. В.И. Вернадскын нэрэмжэтэ бүхэроссиин эрдэм шэнжэлгээр урилдаануудта амжалтатайгаар хабаададаг, уласхоорондын дээдэ һургуулиин “Эко-про” эрдэмэй түбһөө, “Кенгуру” нааданай эмхидхэлэй хороонһоо Баярай бэшэгүүдые, тэмдэгүүдые абаа һэн. Багша өөрөө Обнинск хотодо үнгэргэгдэhэн конкурсдо лауреат болоо. Профессор А.Г. Мордкович 10-11-дэхи ангинуудта зохёоһон түлэбтэнь үндэр сэгнэлтэ үгөө бэлэй. 

Үни һургуулияа дүүргэһэншье һаа, шабинарынь ашата багшаяа ходо һайханаар һанан сэдьхэжэ ябадаг. Тэдэнэр ямаршье үндэр тушаалнуудые эзэлжэ ябабашье, багшадаа хандажал байдаг. Тиигэнгүй яахаб! Нимасу Данзановна һурагша бүхэндөө һанаагаа зобожо, мэргэжэлтэй, айл бүлэ болоһоншье hурагшадтаа һаналаа табижал байдаг һайн һайхан абари зантай ха юм. 

Нимасу Данзановна Цыбикова баян дүй дүршэлөөрөө олон багшанартай хубаалдадаг.

- Ойлгоһоноо ажалдаа тон һайнаар хэрэглэжэ, шабинартаа дамжуулхаб, - гэжэ Бэшүүрэй түбэй 1 дүгээр һургуулиин багша Р.Н. Яковлев тэмдэглээ һэн.

- Ехэ һайнаар һураабди. Һанаһанаа хүсэлдүүлээб, манайшье һургуулида иимэ аргануудые нэбтэрүүлхэдэ таараха, - гэжэ Үбэр Байгалай хизаарай Оборой-Адагай Ц.Ж. Нимаева бэшээ. 

Бэрхэ багша хэшээлһээ гадуур түрэл дайдынгаа хада уулануудай, аршаан булагуудай нэрэнүүд ямар удхатайб, хаанаһаа эхитэйб гэжэ хүүгэдтэ ойлгуулдаг. Уг гарбалаарнь, ёһо заншалнуудаар, шажан мүргэлэй ойлгосонуудаар тэдэниие һонирхуулжа, анхаралынь хандуулжа байдаг. 

Нимасу Данзановна нютагайнгаа олониитын ажалда ехэ эдэбхитэй. Һургуулиингаа эдир зүжэгшэдтэ хубсаһануудые зохидоор тааруулжа оёлсодог. Столой теннисээр мүрысөөнүүдтэ шалгаржа, һургуулиингаа нэрые дээрэ үргэлсэжэ ябадаг.

- Саг гээшэ ехэ түргэн үнгэрнэ. Һаял залуухан басагад ябагша һэмди гэжэ һанахада, наhамнай ябашаһан байнал даа. Залуудаа аха захатаниие, наһажаал багшанарые хүндэлдэг hэмди. Намда час үсөөн гэжэ абяашье гарахагүйш. Һургуулидаа үглөөнһөө үдэшэ болотор хүдэлхэш. Тиигэжэл ажалай баян дүй дүршэлтэй болообди, - гэжэ мүнөө Нимасу Данзановна хөөрэдэг. - Дулма Дубдановна эжынгээ, Данзан Раднаевич абынгаа, эгэшэ аханарайнгаа оролдолго ашаар, заяаһан заяагаар, үйлэдэһэн буянгаар би, одхон басаганиинь урагшатай, урматай бүхы наһаараа ябанаб, зээнэрээ харалсажа һуунаб, - гэжэ ашата багша үнэн зүрхэнһөө хэлэнэ.