​Эхэ газарай "Азбука"

"Манай һургуулиин жэмэстэ сэсэрлиг» гэһэн түсэлөө 28-дахи санаторно интернат-һургуули нёдондо бэелүүлжэ эхилхэдээ, хахад гектар газар хахалжа хорёолоо юм. 

Энэ газар дээрэ эгээн түрүүн Людмила Гончиковна Цырендоржиевагай хүтэлбэри доро 8-дахи ангиин һурагшад долоон янзын үхэр нюдэнэй 130 һөөг һуулгаа. Хүбүүд, басагадай һайн хараһанай, нэтэрүүгээр хүдэлһэнэй ашаар тэдэ модод газартаа тааража үбэлжөөд, хабарай дулаанда намаалжа, үхибүүдэй сэдьхэл баярлуулаа. 

Энэ түсэл үхибүүдэй һонирхол татажа, тэдэнэй дунда огородой эдеэ ургуулгын заабари интернет соо хаража, энциклопеди шудалжа, шэнжэлэлгын ажал ябуулжа эхилээ. 5-дахи ангиин һурагшад Вика Чан-Зун, Кира Болотова, Регина Ванчикова, Арюна Ринчинова, Юрий Кишиктуев, Руслан Тугутов, Тумэн Будаев болон Сэнгэ Шагдуров огородой эдеэ, эм домой зүйлнүүдтэ ородог ургамалнуудые багшанарай В.В. Данилова, Б.И. Батуева, Л.П. Лобсанова, М.М. Гылыкдашиева гэгшэдэй хүтэлбэри доро бүхэли зундаа тэдэнэйнгээ хойноһоо харууһалжа, адаглажа, гэрэл зурагуудыень буулгажа, шэнжэлэлгын ажал ябуулаа. Мүн 6-дахи ангиин һурагшад Илья Зарубин Руслан Дондопов хоёр олон янзын сэсэгүүдые, ургамалнуудые, 7-дохи ангиин һурагшад Станислав Санжиев, Андрей Власенко, Снежана Ефанова, Номина Бальжинимаева морхооб болон гүлзөөргэнэ тариха газараа хабарай сагһаа бэлдэжэ, Н.П. Мантурова, Д.Ц. Галсанова, ба Б.БХ. Сультимова багшанартаяа тэдэнээ һуулгажа, уһалжа, үрмэдэһыень түүжэ, ямараар ургахыень, ямар үтэгжүүлгэ хэрэглэхэдэ һайн бэ гэжэ шэнжэлэн үзөө юм. 

Эдэ бүгэдэ шэнжэлэлгынгээ ажалнуудые 28-дахи һургуулиин һурагшад байгша оной сентябриин 19-дэ Буряад Уласай Арадай Хуралай һунгамал Анатолий Кушнарёвые хэгдэһэн ажалтаяа танилсуулаа. Анатолий Григорьевич шэнжэлэлгын түрүүшын ажалдань үндэр сэгнэлтэ үгэхэһөө гадна, олон шэнэ проектнүүдэй бодолнуудые, үнэтэ заабаринудые хэлэжэ үгөө. 

Мүн сентябриин 22-то түрэл һургуулиингаа дэргэдэ эколого-биологическа түбэй захиралай орлогшо Ирина Андрияновае, Буряадай гүрэнэй дээдэ һургуулиин эрдэм болбосоролой доктор Цыренов Владимир Цыбикжаповичиие, Болбосоролой болон эрдэм ухаанай яаманай мэргэжэлтэн Дашанимаева Оюна Галановнае болон аймагуудай, Улаан–Үдэ хотын һургуулинуудай багшанарые урижа, «Манай хамһабариин ажахын хүгжэлтэ болон ажалаймнай бодото дүршэл» гэһэн уласай семинар үнгэргэгдөө. Тус семинарта 28-дахи санаторно интернат-һургуулиин захирал Цырен Раднаевич Базаров амаршалгын үгэ хэлэжэ: 

- Хамһабариимнай ажахын хоёр теплицэ, огородой эдеэ ургуулха газар хорёологдохо. Тэрэнээ шэмэглэн гоё болгохын тула һурагшадай дунда урилдаан эмхигдээ. Һурагшаднай энэ эрдэм шэнжэлэлгынгээ ажалнуудые үргэлжэлүүлхэ, тиихэдээ дүй дүршэлөөр баян боложо, саашадаа хүгжэжэ, шэнэ шатада гараха гэжэ хараалнабди, – гэжэ һанал бодолоо элирхэйлээ. 

Захиралай эрдэм һуралсалай талаар орлогшо Любовь Бадмацыреновна Цыренжапова һургуулиин ажаябуулгатай сугларагшадые танилсуулаа. Мүн тиихэдэ Е.Ж. Бадмаевагай «Хамһабариин ажахы» гэжэ шэнжэлэл ехэ анхарал татаһан байна. Шэнжэлэлгын ажалай шухала зорилгонь ургажа ябаа улаан бургааһаднай үбэлэй сагта ургамалнуудые яажа ажаллахаб гэһэн номуудые шудалха, харин зунай сагта огородой ургамалнуудые, жэмэстэ һөөгүүдые, сэсэгүүдые болон эмнэлгын ургамалнуудые өөһэдөө тарин ургуулжа шадаха ёһотой гэһэн тобшолол хэгдэнэ. 

Мэргэжэл дээшэлүүлгын олоной хэшээлэй хажуугаар намарай ургасын үзэсхэлэн дэлгээгдэн, эм домой зүйлнүүдтэ ородог ургамалнуудай фитобар хүдэлһэн байна.

- Хамһабариин ажахы хүбүүд, басагадта ерээдүйнь ажабайдалда, хүмүүжүүлгэдэ ехэ нүлөө үзүүлнэ. Энээниие эхэ газарай «азбука» гэжэ тооломоор, – гэжэ 28-дахи хүүгэдэй санаторно интернат-һургуулиин багшанар тэмдэглэнэ. 

Хүүгэд элдэб янзын ургамалнуудай үрэһэ таряад, бүхэли зунаараа ажаллажа, алтан намартаа баян ургаса абаа

Һурагшад огородой эдеэнһээ гадна эм домой бүридэлдэ ородог ургамалнуудые таридаг

Арадай Хуралай һунгамал Анатолий Кушнарёвтой уулзалга