​Буряадаймнай байгаали гамтайхан

Бултанай мэдэһээр, буряад хэлэндэ зорюулагдаһан габшагай һара соносхогдожо, олон хэмжээ ябуулганууд һарын туршада үнгэргэгдэхөөр түсэблэгдэнхэй.

Тэдэнэй тоодо Байгаали хамгаалгын жэлдэ ба буряад хэлэнэй габшагай һарада зорюулагдаһан “Буряадаймнай байгаали гамтайхан” гэһэн хотын сэсэрлигүүдэй хүүгэдэй-түрэлхидэй дуунай мүрысөөн “Сибирячок” гэһэн 112-дохи хүүгэдэй сэсэрлигтэ үнгэргэгдэбэ. Улаан-Үдэ хотын захиргаанай һуралсалай талаар хороон мүрысөө эмхидхэбэ. Энэ түсэл гурбадахи жэлээ бэелүүлэгдэжэ байна.

Арюун һайхан эхэ Буряад дайдыемнай алтаар нэмэриһэн намарай наруулихан энэ үдэр газаа дулаан байба.

Хүдэр эсэгын шэнжэтэй,

Хүгшэрдэггүй эхын энжэтэй,

Урма зоригым үргэдэг,

Уйдхар гашуудал сарадаг,

Арюун агаараар амилуулдаг,

Аршаан булагаар ундалуулдаг,

Хэзээш хооһоржо байгаагүй

Хэтэдээ мүнхэ байгаалимнай,- гээд олон жэлэй туршада буряад хэлэнэй багшаар хүдэлжэ байһан Долгор Ганжурова Марина Лубсанова хоёр энэ мүрысөө нээбэ. “Сибирячок” гэһэн хүүгэдэй сэсэрлигэй түрүүлэгшэ Александра Турунхаева эзэн ёһоор айлшадаа угтажа, амаршалгын үгэнүүдые хэлэбэ.

Айлшаар бууһан 16-дахи “Родничок”, 95-дахи “Рябинушка”, 97-дохи “Земляничка”, 96-дахи “Калинка”, 70-дахи “Солнышко”, 35-дахи “Алые паруса” сэсэрлигүүдэй буряад хэлэнэй багшанар хүмүүжэмэлнүүдтэеэ мүрысөөндэ хабаадаба.

Мүрысөөнэй гол удха ба зорилгонууд хадаа хүүгэд гэртэхинтэеэ хамта байгаалида хабаатай сэдэбээ баримталха ёһотой байгаа бшуу. Тиихэдээ амитадай ба ургамалнуудай нэрэнүүдые гү, али байгаалиин шэнжэ харуулжа бэшэгдэһэн хүүгэдтэ таарама шүлэгүүд дээрэ гоё аялга хүгжэм зохёогдоһон Буряадаймнай дуунууд зэдэлжэ, сугларһан бүхы зониие хужарлуулба.

Хүүгэд, багшанар болон гэртэхин булта буряад хубсаһаа үмдэжэ, тэдэниие харахада аргагүй гоё байба. Хүүгэд буряад хэлэндээ арайл мохоошог, ород хэлэнэй нүлөө ехэ гэжэ адаглахаар. Харин ород үхибүүд буряад хэлэн дээрэ дуунуудые сээжэлдээд дуулажа, омогорхол түрүүлээ.

Шүүгшэдэй мүрысөөнэй дүнгүүдые согсолтор, хүүгэд шагай наадажа, дуунуудые дуулалдажа, таабаринуудые таажа, наадануудта хабаадаба.

Буряад хэлэндэ зорюулагдаһан габшагай һарада болон Байгаали хамгаалгын жэлдэ зорюулагдаһан мүрысөөнэй дүнгүүдээр, нэгэдэхи һуури - “Сибирячок”, хоёрдохи - “Алые паруса”, гурбадахи һуури - “Солнышко” сэсэрлигүүд эзэлбэ гэжэ жюриин түрүүлэгшэ Нина Гармаевна соносхобо.

Ерээдүйн халааниие Эхэ орон, нютаг, тоонто, гэр бүлэ, гуламта, эхэ хэлэн.... гээд лэ нангин үгэнүүдые хэрэглэн хүмүүжүүлбэл, энэ хүн хэзээдэшье Эхэ оронойнгоо нангин һүлдые, буряад гэһэн нэрэеэ хаанашье ябахадаа үргэжэл ябаха гэжэ найдая.

Любовь Цыбеновагай гэрэл зурагууд.