947
Буряад Уласай Ниигэмэй хамгаалгын яаман Эжынэрэй һайндэртэ зорюулагдаһан тоглолтодо бэлэдхэл эхилбэ.
Буряад Уласай Засагай газар, Ниигэм хамгаалгын талаар яаман хамта «Үхибүүд болон одод» гэһэн түсэл бэелүүлнэ. Үншэн үхибүүд, гэртэхинэй харууһагүй үлэһэн үхибүүдтэ олониитын анхарал хандуулха, зохёохы бэлиг талаантай үхибүүдые дэмжэхэ зорилготой энэ хэмжээ ябуулга эмхидхэгдэнэ. Буряад Уласай ниигэмэй эмхи зургануудта байдаг үхибүүд энэ хэмжээ ябуулгада хабаададаг юм.
Буряадай мэдээжэ дуушад болон бүлэгүүд үхибүүдтэй суг хамта бэлэдхэл хэжэ, Эжынэрэй үдэртэ зорюулһан тоглолтодо хабаадаха. Түрүүшын шатада үхибүүдтэй танилсалга үнгэргэгдэһэн байна. Үхибүүн бүхэн дуулажа, хатаржа, шүлэг уншажа, бэлиг шадабарияа харуулаа. Энэ уулзалгын үедэ уласай мэдээжэ зүжэгшэд Дарима Цырендондопова, Сергей Плотников, Сэсэг Аюшеева, Кристина Баженова, Ринчин Дашицыренов, Еши Дармахеев, Анастасия Серных («Раздолье» гэһэн дуу, хатарай арадай ансамблиин дуушан) гэгшэд гоё һайхан тоглолто харуулаа. Удаань тоглолтодо бэлдэхэ түсэбүүд тухай тэдэнэр хэлсэбэ.
Эжынэрэй һайндэртэ зорюулагдаһан «Үхибүүд болон одод» гэһэн түсэл уласай хэмжээндэ гурбадахияа үнгэргэгдэнэ. Байгша ондо ноябриин 24-дэ энэ тоглолто харуулагдаха. Жэлһээ жэлдэ энэ хэмжээ ябуулгада хабаадаха дуратайшуул олон болоно гэжэ тэмдэглэхэ хэрэгтэй.
