618
Буряад Уласай Ивалга аймагта «Аюулгүй, һайн шанартай харгынууд» гэһэн түсэлөөр заһабарилагдаһан харгы ашаглалгада тушаагдаба.
«Аюулгүй, һайн шанартай харгынууд» гэһэн түсэлдэ Улаан-Үдэ болон хото шадархи Ивалга аймагай Ивалга һуурин, Тарбагатай аймагай Тарбагатай тосхон, Загарай аймагай Загарай һуурин, Байгал шадарай аймагай Турунтаево һууринай харгынууд оруулагдаа гэжэ һануулнабди. Эдэ һууринуудта хамтадаа 526 мянган хүн ажаһуудаг, машинын ябадаг харгынуудай утань 864,2 модо болодог юм.
Ивалга аймагтай юрэнхылэгшын түсэлөөр 7,5 модоной харгы заһабарилагдаба. Харгын ашаглалгада тушаагдаха баяр ёһололдо Буряад Уласай Транспортын сайд Сергей Козлов, Ивалга аймагай засаг дарга Виктор Очиров болон харгы заһабарилһан эмхиин түлөөлэгшэд хабаадаа.
«Ородой Холбоото Уласай Юрэнхылэгшэ Владимир Путин энэ түсэл бэелүүлгэ хинажа, шалгажа байдаг. Бидэ ажаһуугшадайнгаа урда харюусалгатайбди. Тэдэнэрэй оруулһан дурадхал энэ түсэлдэ бэелүүлэгдэнэ. Тиихэдээ харгы ганса заһабарилагдана бэшэ, харин ябаган харгынууд, харгы хүндэлэн гараха зүргэнүүд хэгдэнэ. Улас дотор харгынуудые аюулгүй, һайн шанартай болгохо гэжэ оролдонобди», - гэжэ Сергей Козлов хэлэбэ.
Ивалга аймагта дүрбэн һууринуудта харгы заһабарилга хизаарламал харюусалгатай «АртКом» бүлгэм болзортоо дүүргэбэ. Энэ хэрэгтэ 83,8 сая түхэриг һомологдоһон байна. Калёново тосхоной Толстихина гудамжада 2,71 модоной зайда харгы заһабарилагдажа, 37, 7 сая түхэриг гаргашалагдаа. А340 гэһэн федеральна харгыһаа Тапхар һуурин болотор 3,5 модоной зайда, Ивалга һууринай Первомайская гудамжада 0,8 модоной зайда, 800 метртэ ябаган харгынууд, Хойто-Бэе тосхондо Взлётная гудамжада 0,49 модоной зайда харгы заһабарилгын ажалнууд хэгдэбэ.
2018 ондо Ивалга аймагта «Аюулгүй, һайн шанартай харгынууд» гэһэн түсэлөөөр 10,56 модоной харгы заһабарилагдаха. Энэ хэрэгтэ 108 сая түхэриг мүнгэн гаргашалагдаха. 2018-2020 онуудта аймагта дотор 25,21 модоной зайда машинын ябадаг 12 харгынууд заһабарилагдаха түсэбтэй.
