790
Буряад Уласай Элүүрые хамгаалгын яаманай мэдээсэһээр, гурба наһа хүрөөдүй үхибүүд эмүүдээр түлбэригүйгөөр хангагдаха ёһотой. Тэрэнэй ёһоор, алибаа үбшэндэ нэрбэгдэжэ, амбулаторна арга абаһан үхибүүдые эмүүдээр хангалгада 77,5 сая түхэриг мүнгэн 2017 ондо һомологдоо.
Мүнөө дээрээ гүрэнэй эмнэлгын эмхи зургаанууд 44, 5 сая түхэригтэ эмүүдые абаха тухай хэлсээ баталагданхай. Октябрь һарын дүүрэтэр, үлэһэн мүнгэндэнь хэлсээн баталагдаха. 2017 оной октябриин 24-нэй мэдээгээр, 32, 7 сая түхэригэй эмүүдээр 80172 үхибүүд хангагдаа, 161 591 эм абаха рецептнүүд бэшэгдэһэн байна.
Буряад Уласта ажаһуудаг гурба наһа хүрэтэр үхибүүд миинтэ эмүүдээр хангагдаха ёһотой гэжэ һануулнабди. Аргалжа байһан эмшэнэй рецепт болон түрэлхидэй гү, али үхибүүнэй хуулиин ёһоор түлөөлэгшэдэй түрэһэн тухай үнэмшэлгэ харуулжа, гэртэхин үхибүүндээ эм абаха аргатай. Тодорхой мэдээсэл абаха гэбэл, эмнэлгын эмхинүүдтэ хандажа болоно.
