​Эсэгынгээ захяагаар, эхынгээ харгыгаар

Партиин Хориин райкомой нэгэдэхи секре­таряар хүдэлжэ байһан Мирон Николаевич Болдохонов, хирург, акушер-гинеколог Алеф­тина Алексеевна Тронина хоёрой буянтай гэр бүлэдэ Евгения басаган түрэhэн юм. Эсэгэнь 122-дохи үхэр буугай полкын командир ябажа, Улаан Тугай орденой кавалер, хэдэн дайшалхы медальну­удаар шагнагдаһан габьяатай. Шударгы ажалайнгаа түлөө Ажалай Улаан Тугай орденой кавалер болоо бэлэй.

Алефтина эжынь бүхы наhаараа Буря­ад Уласай хирургаар хүдэлөө. Эрдэн Радна­евай hүүлээр Буряа­дай ахамад хирургаар ажаллажа байхадаа, хүүгэдэй түрүүшын хи­рургиин больница эм­хидхээ бэлэй.

Эсэгынгээ захяае, эжынгээ харгые алдангүй ябаха гэжэ шиидэhэн Евгения Эрхүүгэй мединститут 1983 ондо дүүргэжэ, «врач-терапевт» гэhэн мэргэжэлтэй болоод, Эрхүүгэй Усть-Кут хотодо участково терапевтээр, эдиршүүлэй ахамад врачаар, уушханай ханяаданай диспансерэй ахамад врачаар гурбан жэлэй туршада амжалтатайгаар хүдэлжэ байтарнь, Улаан-Үдэ хотын сэрэгэй госпитальдо урижа, сэдьхэлээ баяраар халяагаад, нютагаа бусаа бэлэй. Евгения Мироновна госпитальдо хүдэлжэ байха үедөө хоёр дахин Эрхүүгэй ГИДУВ-та мэргэжэлээ дээшэлүүлhэн юм.

Багшын буянта зам

1994 онhоо Э.Р. Раднаевай нэрэмжэтэ медколледждо медсестра мэргэжэлтэдэй багшаар ажаллана. Шаби­нартаа эмнэлгын аргые гүнзэгыгөөр, уран наринаар, ухаан бодолдонь шэнгэхээр заадаг. Шэлэhэн мэргэжэ­лээ орхингүй, хүн бүхэндэ туhатай, сэлмэг сагаан харгы замтай, хэдышье хүндэ дабаануудые номгон дорюун абари зангаараа урагшаа hанаатайгаар дабажа гарахы­ень ойлгуулдаг. Дүүргэжэ гараhан олонхи шабинарынь Эрхүү, Шэтэ, Москва хотонуудай дээдэ һургуулинуудта эрдэм номоо дээшэлүүлхэеэ эрмэлзэдэг. Дээдын эрдэм­тэй эмшэнэй мэргэжэлтэй болоhон шабинарынь багша­даа ерэжэ, буряад ёhоороо өөһэдөөшье баярлажа, баг­шаяашье баярлуулжа ябадаг.

Үйлсэдэ үлдөөд ябаhаниие эдеэлүүлжэ, бөөhэ хюурһанhаань hалгааха нигүүлэсхы сэдьхэлтэй хүнүүд ехэ хомор бшуу. Манай багшын жэрхэжэ, бомж гэжэ ха­раажа байхыень нэгэшье хүн хараагүй. Евгения Миро­новнае магтажа хөөрэдэг хүнүүд досоохи сагаан hайхан сэдьхэлыень хэр ойлгоноб даа гэжэ заримдаа һанахаш. Ямарханшье ажабайдал хүнэй наhанда дайралдадаг юм ааб даа.

Шабинарай буянта ажал

Ами наhан хүн бүхэндэ хайратай, хэмнайшье алтан энэ дэлхэй дээрэ амиды мэндэ ябаха дуратай. Хэрбэеэ түрэл гаралайнгаа хэн нэгэнэй хүндэ үбшэндэ дайраг­даа hаань, уйлганан, нулимсаяа дуhаан, hанаагаа зо­божо, маани мэгзэмээ уншажа hуудаг үнжэгэн сагаан сэдьхэлтэй буряад арад гээшэбди. Тиибэшье, хүн бүхэн үбшэнhөө бэеэ халхалжа шадахагүй! Мүнөөдэр элүүр энхэ ябаhан хүнэй үглөөдэр ямар үбшэндэ нэрбэгдэхы­ень хэн мэдэхэб?

Эгээл иимэ ушарнуудта Евгения Мироновнагай ша­бинарынь ороhон ажалдаа, үгэhэн тангариг уялгадаа нарин нягтаар хандажа, хүнэй ами наһа абаржа, үдэр hүнигүй hайхан сагаан сэдьхэлээр амжалтатай хүдэлнэд. Москвагай зон эмшэниие гэртээ дуудахадаа, буряад лэ эмшэниие эльгээгты гэдэг болонхой. Түб хотодошье буряад эмшэднай суутай болоо. Эрдэм бэлигтэй ашата манай багша Евгения Болдохоновагай hургаал гараhан шабинарыень дуудана гэжэ мэдээжэ юм.

Хүнэй үбшэ зоболон дээрэ мүнгэ зөөри олохые орол­дожо бү ябаарайт гэжэ шабинартаа дабтан-дабтан захи­жа байдаг. Элдэбын эмнэлгын байрануудые эмхидхээд, хүнэй зоболон дээрэ баяжаhанай хэрэггүй гэдэг. Хүнэй ядарал зоболон дээрэhээ зөөри эдлэхэеэ hанаа бодол табиhан эмшэн һүүлэй һүүлдэ доройтодог. Эмшэн хүн арюун сэбэр, хомхой хобдог ябадалгүй, үнэн сэхэ байха хэрэгтэй гэжэ ойлгуулдаг.

Нэгэ шабияа дэмжэжэ ехээрхүүлээгүй, нүгөөдыень муудхажа доройтуулаагүй, шаби бүхэнөө адли тэгшэ абаад ябадаг юм. Ажалай ветеран болобошье, багшын­гаа дэмбэрэлтэ ажалые үргэлжэлүүлhэн зандаа.

Евгения Мироновна биб гэжэ нэгэтэшье нэрэлхээгүй, хүнhээ доогууршье ябаагүй, хүнhээ дээрэ болохомни гэжэшье оролдоогүй, сэлмэг тэг­шэ харгытай, тоолошогүй олон шабинартай, үндэр наhанай эрмэг гэшхэhэн хайрата манай буянта баг­ша мүн.