759
Байгша ондо Байгал шадарай аймагта 8,3 модоной харгы заһабарилгада 51,8 сая мүнгэн һомологдоһон байна. 2018 ондо 24,6 модоной зайда харгы заһабарилгада 173,44 сая мүнгэн гаргашалагдаха.
Буряад Уласай Байгал шадарай аймагта «Аюулгүй, һайн шанартай харгынууд» гэһэн түсэлөөр заһабарилагдаһан харгынууд октябриин 25-да ашаглалгада тушаагдаа. Тиихэдэ аймагай түб Турунтаево һууринай болон Итанца тосхоной – Юбилейная, Троицкое тосхоной - Октябриин 60 жэлэй, Кома тосхоной – Романовскиин, Ильинка тосхоной – Коммунистическая гудамжануудта харгы заһабарилагдаа.
Буряад Уласай Транспортын, элшэ хүсэнэй болон харгын ажахын сайд Сергей Козлов харгы ашаглалгада тушаалгын баяр ёһололой үедэ хэлэһэнэй ёһоор, 2025 он болотор Байгал шадарай аймагта 571 сая түхэригтэ харгы заһабарилагдаха.
Хойто жэлдэ «Аюулгүй, һайн шанартай харгынууд» гэһэн түсэлөөр Турунтаево, Ильинка, Мостовка, Итанца, Троицкое нютагуудта болон Татаурово станцида харгынууд заһабарилагдаха.
Ородой Холбоото Уласай Юрэнхылэгшын «Аюулгүй, һайн шанартай харгынууд» гэһэн түсэл гүрэн дотор харгынуудые заһабарилха зорилготой бэелүүлэгдэнэ. 2017-2018 онуудта 2,5 миллиард түхэриг гаргашалагдажа, 181 модонһоо дээшэ харгынууд заһабарилагдаха. Улаан-Үдын болон хото шадархи дүрбэн аймагуудта харгы заһабарилгада федеральна бюджетһээ 1,25 сая түхэриг гаргашалагдаха юм.
