740
2017 ондо Буряад Уласай Загарай аймагта «Аюулгүй, һайн шанартай харгынууд» гэһэн түсэлөөр харгы заһабарилагдажа, 6,1 модоной зайда харгы гэрэлтүүлэгдэбэ.
Харгы ашаглалгада тушаалгын баяр ёһололдо Буряад Уласай Транспортын сайд Сергей Козлов, Арадай Хуралай һунгамалнууд болон «Бурятрегионавтодор» эмхиин хүтэлбэрилэгшэ Виктор Замкин гэгшэд хабаадаба.
«2018 ондо Загарай аймагта 198,9 сая түхэригтэ 17 модоной зайда харгы заһабарилагдаха. Тэрэнэй 6 модониинь Улаан-Үдэ-Загарай-Хэжэнгэ-Хори харгыда, 11 модоной зайда Онохой-Загарай-Хэжэнгэ-Новая Брянь-Старая Брянь харгыда заһабарилгын ажалнууд хэгдэхэ. 2019-2025 онуудта Загарай аймагта 104 модоной зайда харгы заһабарилагдаха. Нэрлэбэл, Онохой һууринай сэрэгшэдэй 18-дахи һуурин болон Усть-Брянь хүрэтэр, тиихэдэ Загарай, Онохой һууринуудта, Дабаата, Эрхирик, Нижние Тальцы нютагуудта машинын ябаха харгы шэнэлэгдэхэ» - гэжэ Буряад Уласай Транспортын сайд Сергей Козлов баяр ёһололой үедэ хэлэбэ.
2017 ондо Загарайн аймагта харгы заһабарилгада 278,7 сая түхэриг һомологдоо. Загарай һууринай 7 гудамжануудта, Онохой һууринай – 6, Эрхиригтэ нэгэ гудамжада харгы шэнэлэгдэжэ, ашаглалгада тушаагдаа. Тиихэдэ Улаан-Үдэ-Загарай-Хэжэнгэ-Хори гэһэн уласай харгыда хоёр газарта харгы заһабарилагдаһан байна. 43-53-дахи модоной, долоон метр үргэнтэй харгын зайда «Байкалагропром» эмхи заһабарилгын ажалнуудые хэбэ. Энэ ажалда 97,2 сая түхэриг гаргашалагдаа. 62-65-дахи модоной харгыда «АртКом» эмхи харгы заһабарилаа .
22-30-дахи модоной зайда «Ремстрой» гэһэн эмхи харгы гэрэлтүүлгын ажал бүтээгээ. «Аюулгүй, һайн шанартай харгынууд» гэһэн түсэлөөр харгы заһабарилга үргэлжэлүүлэгдэхэ.
«Аюулгүй, һайн шанартай харгынууд» гэһэн түсэлөөр Улаан-Үдэдэ болон хото шадархи дүрбэн аймагуудта харгы заһабарилагдаха гэжэ һануулнабди. 2017 ондо Ивалга аймагта - 7,5 модоной зайда, Тарбагатай аймагта – 2,5 модоной зайда болон Байгал шадарай аймагта – 8,3 модоной зайда харгы заһабарилагдаа.
