​Буряад Уласай холо оршодог нютагууд интернет холбоотой болобо

Буряад Уласта Нарһата-Шэрэнги-Гунда-Иисингэ- Романовка-Хиагда нютагуудта оптоволоконно холбоо татагдаба.

Ярууна болон Бабанта аймагуудай холо оршодог нютагуудай дүрбэ мянгнһаа дээшэ ажаһуугшад түргэн интернет холбоотой болобо.

Буряад Уласай Засагай газар «Росатом» гэһэн гүрэнэй корпораци болон хуби ниилүүлһэн нээмэл «Ростелеком» бүлгэмтэй хэлсээ баталжа, интернет холбоо татагдаһан байна.

- Буряад Уласта 201 модоной зайда оптоволокно татагдаа. Энэ хэрэгтэ 89 сая түхэриг мүнгэн һомологдоо, тэрэнэй 35 сая түхэриг - «Росатом» корпораци гаргашалаа, 54 сая түхэриг «Ростелеком» бүлгэм гаргашалһан байна. Мүнөө һайн шанартай интернет холбоо Шэрэнги, Гунда, Иисингэ, Романовка һууринуудта татагдаа. Тиихэдэ энэ холбоодо нэн түрүүн һургуулинууд болон эмнэлгын эмхи зургаанууд хамжагдаха», – гэжэ Буряад Уласай Транспортын, элшэ хүсэнэй болон харгын ажахын сайд Сергей Козлов хэлэбэ..

Тиихэдэ 2017 оной дүүрэтэр хуби ниилүүлһэн «Хиагда» бүлгэмэй ээлжэлэн хүдэлмэрилэгшэдэй һууринда интернет холбоо татагдаха.

Ростелеком Буряад Уласта анхан иимэ ехэ ажал хээгүй гэжэ уласай хүтэлбэрилэгшэ Алексей Цыденов хэлэһэн байна. Энэ бүлгэм 1,5 мянганай оптоволокно улассай холо оршодог аймагуудта татаха түсэбтэй. Ростелеком бүлгэм 250 – 500 ажаһуугшадтай һууринуудые болон эмнэлгын эмхи зургаануудые түргэн интернет холбоотой болгохо гэһэн хоёр программар улас дотор ажал ябуулна.