591
Ноябриин 2-3-най үдэрнүүдтэ Буряадай гүрэнэй ехэ һургуулида «БайкалРобоФест 2017» гэһэн болбосоролой робототехникын можо хоорондын IV-дэхи фестиваль эмхидхэгдэнэ.
Энэ хэмжээ ябуулгада Буряад Уласай болон Эрхүү можын 7-тойһоо 14 наһа хүрэтэр 133 үхибүүд хабаадана.
- Таанар бултадаа илагшад гээшэт. Энэ фестиваль саашадаа үнгэргэгдэжэ байха гэжэ найданаб. Эндэ таанар шэнэ эрдэм мэдэсэтэй, дүй дүршэлтэй боложо, саашанхи ажабайдалтнай заатагүй хэрэгтэй болохо, - гэжэ Болбосоролой болон эрдэм ухаанай сайдай орлогшо, юрэнхы болон нэмэлтэ болбосоролой хорооной түрүүлэгшэ Валерий Поздняков эдир роботехнигүүдые амаршалба.
«БайкалРобоФест» гэһэн болбосоролой робототехникын фестиваль 4-дэхиеэ эмхидхэгдэжэ, үхибүүдые зохёон бүтээхэ шадабаритай болгохо, саашадаа инженернэ-техническэ мэргэжэл шэлэхээр урмашуулха зорилготой гэжэ эмхидхэгшэд хэлэнэ.
- Робототехникэхадаа шэнэ һалбари болоно. Эндэ юумэ ухаалдижа, удаань тэрэнээ бүтээжэ, суглуулжа, хүдэлгэхэ ёһотой болоно ха юм. Рободые бүтээгээд дүүрэшэхэ бэшэ, тэрэнь хүдэлжэ шадаха, тусхай зорилго дүүргэхэ болоно. Тиимэһээ үхибүүд энээгээр һонирхохо гэжэ найданабди, - гэжэ Буряад Уласай Болбосоролой болон эрдэм ухаанай яаманай нэмэлтэ тусхай болон интернатна эмхинүүдэй болбосоролой таһагай дарга Доржо Фролов тэмдэглэбэ.
Һурагшад «Кегельринг», «Сумо», «Танковый биатлон», «Космический мусор» гэһэн шэглэлнүүдээр мүрысэхэ. Шэглэл бүхэндэ үхибүүдэй зохёон байгуулһан робот тусхай даабаринуудые дүүргэхэ.
Анна Огороднигой гэрэл зураг.
