783
Үдэр һүнигүй хаа-хаанагүй аюулгүй байдал сахидаг сагдаанар Ородой Холбоото Уласай Үндэһэтэнэй гвардиин сэрэгшэд Николай Бестужевай нэрэмжэтэ Ород драмын театрай ордондо октябриин 31-дэ баяр ёһолол эмхидхэбэ. Эгээл тэндэ сэрэг суурта, мүн Дотоодын хэрэгүүдэй албанда үнэн сэхээр хүдэлһэн мэргэжэлтэдэй эрхимүүдэйнь мүрнүүд дээрэнь тохёодог мүшэд нэгэн гээ һаа, олон болобо, үгы гээ һаа, бэеэр томо болоод орхибо. Тэдээнһээ гадна тусхай захиралтануудай дагуу гүрэнэй, Буряад Уласай Засагай газарай, Арадай Хуралай болон бусадшье засагай зургаануудай Баярай бэшэгүүд барюулагдаба. Албан газарһаа гадуур харуул хэдэг мэргэжэлтэд энэ һайндэртэ наһанайнгаа амаралтада гараһан зоноо, халуун байлдаануудта, гэмтэ ябадалтантай тэмсэхэ үедөө баатарай үхэлөөр унаһан сэрэгшэдые уриһанииень онсо тэмдэглэлтэй.
Албан газарһаа гадуур харуул гээшэ мүнөөнэй сагай оньһон техникээр хүсэд хангагданхай. Тиимэһээ харууһан дороо абаһан гэр байрануудые, ехэ болон бага байшангуудые, эмхи зургаануудые хулгайшадһаа болон бусад хара һанаатанһаа найдамтайгаар аршалдаг байна. Гадна Улаан-Үдын харанхы бүрэнхы гудамжануудаар үдэр һүнигүй ябажа, гэмтэ ябадалнуудһаа хотын ажаһуугшадые хамгаална. Зохихогүй газарта зогсоод, архи тамхи балгагшадые балшыса барихын тула һөөг модонуудые, Сэлэнгэ болон Үдын эрьенүүдые, хотын гудамжануудай углуу шанаануудые һуулижа, захиргаанай харюусалгада татана. Иимэ хүдэлмэри ябуулжа ябаһан сагдаа бүхэн энэ үдэр наһанаймни эсэс боложо магад гэжэ хододоо мэгдэжэ ябадаг юм. Ой модон үндэртэй набтартай, хүн зон муутай һайтайл ха юм.
- 65 жэл гэнэбди. Охорхон саг гээшэ ааб даа. Хэды тиигэбэшье, эгээлэнэ хугасаада милицидэ алба хаажа байһанаа, хожомоо полици гэжэнэрэшээд, үни болонгүй Үндэһэнэйгвардиин сэрэгэй бүридэлдэороһон таанар – Буряад Уласайалбан газарһаа гадуур харуулайХүтэлбэриин албатад эрхим түүхэзохёобот, - гэжэ аюулгүй байдал хангаха асуудалнуудаар Буряад УласайЗасагай газарай Түрүүлэгшын орлогшо Пётр Мордовской үгэ хэлэбэ. – Минии Дотоодын хэрэгүүдэйтаһагта хүдэлдэг байхадамни, албангазарһаа гадуур харуулшад һүниинмилици гэжэ алдаршаһан байгаа. Танһаа ондоо сагдаа һүниин сагта алба хаадаггүй байһан юм. Эгээл танай ашаар бузархан гэмтэ ябадалнуудые бүтээдэг ямар олон гэмтэ ябадалтан балшыса баригдаа гээшэб? Тэдэниие тогтоохын тула танай нүхэд ами наһаяашье хайрлаагүйл даа. Буу барижа добтолходонь, хутагаар хадхахадань, танай нүхэд эрэлхэг зүрхэтэйгөөр урдаһаань гаража, хорон сэдьхэлтэнэй һүрыень дараа. Би иимэ габьяануудыетнай элеэр һанажа ябадагби. Танай албаниие домог түүхэтэ полковнигууд ударидажа ябаа. Ябанашье. Тэдэнэр ехэхүдэлмэри хэжэ үрдеэ.
Залуушуул, урагшаа!
Буряад Уласай Арадай Хурал сэрэгшэд болон сагдаанарые өөрынгөө зүгһөө хани халуунаар амаршалба. Буряад Уласай Арадай Хуралай Гүрэнэй байгуулалтын, нютагай өөһэдын хүтэлбэриин, хуули ёһоной болон гүрэнэй албанай асуудалнуудай талаар хорооной түрүүлэгшын орлогшо Виктор Малышенко, Арадай Хуралай һунгамал Сергей Пашинский хуули зохёодог засагай зургаанай зүгһөө Цырен-Даши Доржиевай амаршалга хүргэбэ:
«Хуули болон эрхэ сүлөө хамгаалха хэрэгые таанар ханганат. Энээнһээ гадна гүрэнэй болон үмсын эд зөөри аршалха талаар хүдэлмэри ябуулнат. Танай шадамар бэрхэһээ, харюусалгатай байһанһаа гүрэнэй нэрэ хүндэ, тэрэнэй эрхэтэдэй аюулгүй байдал, амар заяан, сэлмэг ерээдүй дулдыдана ха юм».
Ородой Холбоото Уласай Юрэнхылэгшын бүрин эрхэтэ түлөөлэгшын аппарадай гүрэнэй ахамад байсаагша (инспектор) Сергей Ромахин үндэр тушаалтадай болон өөрынгөө зүгһөө удха түгэлдэр үгэнүүдые айладаба:
«Би таанадые үнэн зүрхэнһөө 65 жэлэйтнай ойгоор хани халуунаар амаршалнаб! Хүнгэн бэшэшье, Буряад Уласта ехэ хэрэгтэй энэ ажалтнай амжалтатай байг! Жэл ошохо тума хүдэлмэрилэгшэдтнай шадамар бэрхэнүүд боложо байг! Алба хаахаяа ерэһэн залуушуул нюдэндөө галтайхан, оролдосотой, һонор ябаг лэ! Харин тэдэнэй дунда хүмүүжүүлгын хүдэлмэри танай ноёд, албан газарһаа гадуур харуулай ветеранууд ябуулжа, ёстой сагдаа, ёстой сэрэгшэ болгоно бэзэ».
Сагдаанар һайндэртэшье хүдэлнэд
- Ородой Холбоото Уласай үндэһэнэй гвардиин албан газарһаа гадуур харуулай Буряад Уластахи хүтэлбэриин ноёдой зүгһөө та бүгэдэниие 65 жэлэй ойгоор хани халуунаар амаршалнаб, - гээд, албан газарһаа гадуур харуулай Хүтэлбэриин дарга Евгений Котов нэгэ ажалта зондоо хандаба. – Мүнөө хүдэлжэ байгаа сагдаанар болон сэрэгшэднай ажалаа бэрхээр ябуулна гэжэ хэлэхынгээ хажуугаар мүнөө наһанайнгаа амаралтада гараһан аха захатандаа доро дохин, баярые хүргэхэ ушартайб. Гадна баатарай үхэлөөр унаһан хүбүүдээ бидэ хэтын хэтэдэшье мартахагүйбди. Зургаан сагдаанарнай шэн зоригтой, ёстой сэрэгшэд байһанаа харуулаа. Би эндэ һуугаа эжы абанартань, аха дүүнэртэнь, наһанайнь ханинарта болон хүүгэдтэнь баяр баясхалан хүргөөд, доро дохижо, мүргэхэ байнаб.
Заншалта ёһоороо ойн баярай үдэшэнүүд гоё гэгшын тоглолтоор эсэслэдэг гээшэ. Буряад Уласай, Улаан-Үдэ хотын урдаа хараха зохёохы бүлэгүүдтэй зэргэ, аюулгүй байдал сахидаг ажалтай сагдаанар, сэрэгшэд дуу дуулажа, суг хүдэлдэг нүхэдэйнгөө халуун альга ташалга хүлеэн абабад. Эгээл энэ сагта, эгээл энэ хирэдэ албандаа ябаһан сагдаанар болон сэрэгшэд үнөөхил гэмтэ ябадалтантаяа тэмсэһэн хэбээрээл байба.
Албан газарһаа гадуур харуулай олондо мэдээсэлэй албанай дурадхаһан гэрэл зураг.
Баяр ЖИГМИТОВ
