715
Олимпиин, Паралимпиин болон Сурдлимпиин наадануудта түрүү болон шангай һууринуудые эзэлһэн тамиршад 2018 оной январиин 1-һээ һара бүри гүрэнэй тэдхэмжэ абадаг болохонь. Ноябриин 2-то болоһон Буряад Уласай Арадай Хуралай сессидэ иимэ шиидхэбэри абтаһан байна.
Сүлөөтэ барилдаагаар Сурдлимпиин наадануудта түрүү һуури эзэлһэн Александр Цоктоев ба Григорий Кожевников хоёр 30 мянган түхэриг абадаг болохоор хараалагдана. Һур харбалгаар Олимпиин наадануудта шангай хоёрдохи һуурида гараһан Инна Степанова, сүлөөтэ барилдаагаар болон футболоор Сурдлимпиин наадануудай мүнгэн медаль абаһан Андрей Захряпин болон Александр Павлуцкий гэгшэд 24 мянган түхэриг һара бүри абаха байна. Барилдаагаар Олимпиин наадануудта гурбадахи һуурида гараһан Любовь Волосова болон Базар Базаргуруев гэгшэд 18 мянган түхэригөөр урмашуулагдаха.
Буряад Уласай Арадай Хуралай һунгамал Бато Семёнов тус асуудал сессиин үедэ табихадаа, бидэ ехэ буянтай хэрэг бүтээжэ байнабди гэжэ тэмдэглээ. Удаань үшөө иигэжэ нэмээ:
- Манай урдаа хараха тамиршадай зариманиинь ажалгүй һууна, нүгөөдүүлынь бага салинтай ажалтай. Тиимэһээ Буряад Уласые холо ойгуур суурхуулһан тамиршадта һара бүриин түлбэри туһа нэмэри боложо үгэхэ.
Залуу ябахадаа өөһэдөө тамиршад байһан Арадай Хуралай һунгамалнууд Виктор Абушеев болон Степан Калмыков гэгшэдэй хэлэһээр, Олимпиин наадануудай орьёл өөдэ тон үсөөн хүнүүд хүрэдэг ха юм.
- Мүнөө сагта Буряад Уласнай өөрын хүмүүжүүлһэн олимпиин чемпион үгы байна. Абарга боложо шадаһан тамиршаниие хэдэн арбаад жэл соо хүлеэнэбди, - гэжэ Виктор Абушеев хэлэһэн байна. Мүнөө үедэ Буряадай санашан Алиса Жамбалова үбэлэй Олимпиин наадануудта ошохын түлөө оролдожо байна. 2017-2018 оной халаанай эхиндэ тэрэ һайн дүнгүүдые харуулбал, Урда Солонгос ошохо аргатай.
- Пьёончанг болотор оройдоо гурбан һара үлөөд байна. Арадай Хурал шалгарһан тамиршадта һара бүриин тэдхэмжэ үгэхэ гэжэ Алиса Жамбалова дуулабал, бүри эрмэлзэлтэйгээр бэлэдхэл хэжэ, һайн дүнгүүдые харуулхаа оролдохол. Ганса Алиса бэшэ, мүн бусад залуу тамиршад оролдосотойгоор ерээдүйдэ хүдэлхэ, - гэжэ Степан Калмыков таарамжуулан хэлээ.
Үндэр хэмжээнэй мүрысөөнүүдтэ гэнтэ тамиршад шүүгээд гарашадаггүй ха юм. Тэдэниие олон жэлэй хугасаа соо һоригшод шанга бэлэдхэл хэнэ. Тэдээндэ баһа тэдхэмжэ үзүүлхэ байгаа гээд олон спортдо дуратайшуул һануулна. Буряад Уласай Спортын болон залуушуулай хэрэгүүдэй талаар яаманай сайдай уялгануудые дүүргэгшэ Сергей Периновэй хэлэһээр, энэ ажал багаханаар ябуулагдажа байна. 2018 ондо Буряад Уласай “Бэеын тамир тухай” Хуулида нэмэлтэ болон хубилалтанууд оруулагдабал, һоригшод мүнгөөр хангагдаха.
Борис Балданов
