802
“Erkhim Darkhan” гэһэн мастерской морилхоо байгаа шара нохой жэлдэ зорюулһан урилдаа соносхобо.
Урилдаанда хабаадахаяа хүсэгшэд модоор, пластигаар, пластилинээр, шара шабараар нохой урлан бүтээгээд, эмхидхэлэй хороон руу эльгээхэ аргатай. Бусадһаа уранаар, наринаар бүтээгдэһэн нохойнуудые “Erkhim Darkhan” гэһэн мастерскойн уран гартан шэлэн абаад, хүрэлөөр шудхажа олошоруулаад, сувенир болгоожо, наймаанда дурадхаха байна. Эгээл тиимэһээ сэдэбтээ хэр тааруугаар дархалаатайб, олонойхиһоо онсо илгаатай гү, хэр зэргэ наринаар хэгдээтэйб гээд, хүдэлмэринүүд сэгнэгдэхэ юм.
Наһанай, мэргэжэлэй талаар урилдаанда оролсогшодто тусхай эрилтэнүүд табигданагүй: хэдытэйшье, ямаршье мэргэжэлтэй зон хабаадаха арга боломжотой бшуу.
Мастерскойн уран хүтэлбэрилэгшэ Доржиев Шэмэд лама түрүүтэй жюриин гэшүүд илагшын нэрэ тодоруулха юм. Илажа гараһан хүн абаха шангаа өөрөө шэлэхэ болоно. 10 мянган түхэриг гү, али нэгэ һарын туршада Erkhim Darkhan гэжэ мастерскойдо салинтай һуралсал гараад, ажалтай болохо гү – түрүүлжэ гараһан хүнэй өөрынь дуранһаа дулдыдана.
Декабриин 22 хүрэтэр Ленинэй гудамжа, 42 гэһэн хаягаар оршодог Азиин арадуудай урлалай галерейдэ мэдүүлгэ оруулаад, хүдэлмэриеэ тушаагыт!
Декабриин 23-һаа дүнгүүдынь согсологдохо. 2018 оной февралиин 9-дэ илагшын нэрэ элирхэ юм.
http://galleryasia.ru/news/551/ иимэ хаягаар тодорхой мэдээ абажа болоно
Лаблаха утаһан: 8 (902) 450-42-42
