650
Буряад Уласай Спортын болон залуушуулай бодолгын талаар сайдай тушаал эзэлхэ хүсэлтэй гурбан хүн ноябриин 9-дэ конкурсын хоёрдохи шата гараба. Вячеслав Дамдинцуруновай түлөө – 15, Эрдэни Дымчиковэй түлөө – 13, Анатолий Белоусовай түлөө конкурсын комиссиин 8 гэшүүд дуугаа үгэһэн байна.
Ноябриин 8-да үндэр тушаал эзэлхэ конкурсын түрүүшын шата түгэсэһэн байна. Тиихэдэ сайдай тушаалда зууршалагшадай дансанууд шалгагдажа, дээдэ мэргэжэлтэй, тус һалбарида ажалай дүршэлтэй болон хүтэлбэрилгын дүй дүршэлтэй байха гэһэн эрилтэнүүдтэ хэр зэргэ тааранаб гэжэ шалгагдаа. Тэрэнэй дүнгүүдээр, ороһон 118 мэдүүлгэнүүдэй 18-ниинь конкурсын эрилтэнүүдтэ таараагүй.
Буряад Уласай Спортын болон залуушуулай бодолгын талаар сайдай тушаал эзэлхэ конкурсын хоёрдохи шатада юһэн хүн хабаадаба. Тэдэнэр 15 хүнһөө бүридэһэн комиссиин гэшүүдэй асуудалнуудта харюусажа, өөрынгөө программа тухай хөөрэбэ.
Мүнөөдэр, ноябриин 10-да, Буряад Уласай Соёлой сайдай тушаалда мэдүүлгэ оруулһан 15 хүнһөө 14-ниинь комиссиин гэшүүдтэй уулзаха. Ноябриин 13-14-нэй үдэрнүүдтэ Аяншалгын сайдай тушаал эзэлхэ 36 дуратайшуул конкурсын хоёрдохи шатада хабаадаха. Ноябриин 15-16-най үдэрнүүдтэ Эдэй засагай сайдай тушаалда зууршалагшад комиссиин асуудалнуудта харюусаха. Тэдэнэй 30 хүнһөө 23-ниинь конкурсдо хабаадаха. Ноябриин 17-до Буряад Уласай Элүүрые хамгаалгын яаманай хүтэлбэрилэгшэ шэлэн абалгын хоёрдохи шатада 18 хүн комиссиин гэшүүдтэй уулзаха.
Үндэр тушаал эзэлхэ хүсэлтэй, конкурсын хоёрдохи шата гараһан хүнүүд ноябриин 23-һаа 30 болотор гурбадахи шатада хабаадаха. Тэдэнэр очно тестированиин асуудалнуудта харюусаха. Эрхим харюу үгэгшэдэй ажалнууд Буряад Уласай Толгойлогшо Алексей Цыденовтэ дамжуулагдаха. Конкурсдо хабаадагшад уласай хүтэлбэрилэгшэтэй уулзажа, һүүлээрнь яамануудай хүтэлбэрилэгшэдые томилхо талаар шиидхэбэри абтаха.
