​Буряад Уласай Соёлой сайдай тушаал эзэлхэ конкурсын хоёрдохи шата

Мүнөөдэр, ноябриин 10-да, Буряад Уласай Соёлой сайдай тушаалда зууршалагшадай конкурсын 2-дохи шата үнгэргэгдэбэ.

Буряад Уласай Засагай газарай Түрүүлэгшын ниигэмэй хүгжэлтын талаар орлогшо Вячеслав Цыбикжапов түрүүтэй конкурсын гэшүүдтэй Соёлой яаман хүтэлбэрилхэ тухай мэдүүлгэ оруулһан 14 хүнүүд уулзаба. Тэдэнэр тус һалбари хүгжөөхэ тухай программануудые бэлдэжэ, комиссиин гэшүүдэй асуудалнуудта харюусаба. Комиссиин гэшүүдэй һунгаһан ёһоор, конкурсын удаадахи шатада хабаадаха дүрбэн хүн элирүүлэгдэбэ. Нэрлэбэл, П.И.Чайковскиин нэрэмжэтэ Соёл, урлагай колледжын хүтэлбэрилэгшэ Баир Турбянов, «Буряад үнэн» гэһэн хэблэлэй байшанай захирал Баир Балданов, хизаарламал харюусалгатай «Информполис» бүлгэмэй захирал Соёлма Дагаева болон Улаан-Үдын захиргаанай соёлой талаар хорооной түрүүлэгшэ Ирина Ковалева гэгшэд болоно. Баир Турбянов Баир Балданов хоёрой түлөө комиссиин 9-9 гэшүүд дуугаа үгэбэ, Соёлма Дагаева, Ирина Ковалева гэгшэдэй түлөө 8-8 гэшүүд һунгаба.

«Ковалева Дагаева хоёрой түлөө 8-8 хүн дуугаа үгэһэн байна. Тиимэһээ комиссиин гэшүүдэй шиидхэбэреэр, эдэнэр удаадахи шатада хабаадаха. Эдэ дүрбэн удаань тестировани гаража, эрхим ажалнуудынь Буряад Уласай Толгойлогшо Алексей Цыденов хараха», - гэжэ Буряад Уласай Толгойлогшын болон Засагай газарай захиргаанай ажалшадые бүридхэхэ бодолгын болон гүрэнэй албанай талаар асуудалнуудай хорооной хүтэлбэрилэгшын орлогшо Балта Дагбаин хэлэбэ.

Ноябриин 8-да үндэр тушаал эзэлхэ конкурсын түрүүшын шата түгэсэһэн байна гэжэ һануулнабди. Тиихэдэ сайдай тушаалда зууршалагшадай дансанууд шалгагдажа, дээдэ мэргэжэлтэй, тус һалбарида ажалай дүршэлтэй болон хүтэлбэрилгын дүй дүршэлтэй байха гэһэн эрилтэнүүдтэ хэр зэргэ тааранаб гэжэ шалгагдаа. Буряад Уласай Соёлой яаман хүтэлбэрилэхэ хүсэлтэй 15 мэдүүлгэ ороһон байна.

Буряад Уласай Толгойлогшо Алексей Цыденовэй даабаряар, элүүрые хамгаалгын, аяншалгын, эдэй засагай, соёлой, спортын болон залуушуулай бодолгын талаар яамануудые хүтэлбэрилэгшэдые шэлэн абаха конкурс үнгэргэгдэнэ. Бүхыдөө конкурсдо хабаадаха тухай 118 мэдүүлгэ ороһон юм.