756
Байгша оной ноябрииин 3-7 ной үдэрнүүдтэ Екатеринбург хотодо WorldSkills Hi-Tech гэһэн Үндэһэтэнэй чемпионат үнгэргэгдэбэ. Энэ хэмжээ ябуулгада Улаан-Үдын һурагшад амжалтатай хабаадаба.
2017 оной чемпионатда 300 гаран залуушуул мүрысэжэ, гуша мянганһаа дээшэ харагшад байба. Томошуулһаа гадуур энэ хэмжээ ябуулгада 14-тэйһөө 16 наһа хүрэтэр һурагшад хаба шадалаа туршаһан байна. «Сетевое и системное администрирование» гэһэн шэглэлээр телекоммуникациин болон информатикын Сибириин гүрэнэй ехэ һургуулиин Буряадтахи таһагай «Прорыв» гэһэн команда илалта туйлаба. Улаан-Үдын 33-дахи һургуулиин Алексей Кузин болон 52-дохи һургуулиин Максим Мостовской хоёр уласаа түлөөлһэн байна. Бэлигтэй хүбүүдые энэ мүрысөөндэ телекоммуникациин болон информатикын Сибириин гүрэнэй ехэ һургуулиин Буряадтахи таһагай хүдэлмэрилэгшэд Максим Жигжитов болон мэргэжэлтэ шүүбэришэ Артём Матвеев гэгшэд бэлдэбэ.
Чемпионадта бүхыдөө 129 һурагшад 19 шэглэлээр хабаадаа гэжэ тэмдэглэлтэй.
WorldSkills Hi-Tech гэһэн мүрысөөн Ородой Холбоото Уласай залуу мэргэжэлтэдэй дунда 2014 онһоо хойшо Екатиренбург хотодо олон зоной хабаадалгатайгаар үнгэргэгдэдэг юм. Жэл бүри Ород гүрэнэй корпорацинуудай болон томо эмхинүүдэй үйлэдбэриин талмайда эмхидхэгдэдэг мүрысөөнүүдтэ уласай хэмжээндэ илагшад түгэсхэлэй шатада хабаададаг юм.
