​Шэдитэ субаргын домог

Загарай аймагай Хотогор гэжэ газарта үндэр добо дээрэ ехэ һонин түхэлтэй субарга бодхоогдонхой. Хэзээ нэгэтэ энэ газараар хүннү гэһэн арад ажамидараашье байгаа. Шулуугаар дархалһан зүйлнүүдэй үлэгдэлнүүд болон нүүдэлшэ арадай аян замай харгышье ёһотой.

Тарба хүбүүхэн энэ газарта багахан бунхан харадаг һэн. Досоонь ороходо, сүгсэ болон элдэб мүргэлэй хэрэгсэлнүүд хаяатай. Томохон боложо эхилхэдээ, энээхэн бунхан һэргээжэ, томо болгохоб даа гэжэ ходо хүсэжэ ябаа бшуу. Оршон тойронхи байгаали үхибүүнэй нюдөөр бэшэ, бодолтой нюдөөр харахада, ехэ һонин газар байшоо.

- Мүнөө баруун таладань ехэ ой урганхай. Харин аяар холын хүннүүгэй үедэ нэмжыһэн үргэн талашье байжа магад. Энэ толгой өөдэ гарадагшье байжа болоо, - гэжэ Тарба лама һанамжаараа хубаалдана.

Дүрбэн тала тээшээ дүрбэн бурхан табяатай. Дундань толи хэгдэнхэй. Энэнь хадаа ехэ баһал удхатай. Эсэгэ ороноо хамгаалгын дайнда мордоһон нүхэрөө, хүбүүгээ хүлеэжэ ядаад, амиды мэндыень мэдэхэеэ эхэнэрнүүд үзэлшэ ламада хандадаг байгаа. Тэрэнь (нарин тамхинай) папиросой саарһан дээрэ тэрэ хүнэйнгөө нэрэ бэшээд, зулынгаа голтой нарииханаар орёогоод носоодог һэн. Мэгзэм уншажа эхилхэдэнь, гэрэлдэнь харахаяа һанаһан хүнэй дүрсэ бии болодог. Хэрбээ нүгшэһэн һаа, нюргаараа хараад байха. Иигэжэ урданай зон хэлсэдэг. Гэхэ зуура, иимэ арга юрын хүндэ үзэгдэхэгүй, 108 дахин мэгзэм уншаһан хүндэл харагдаха. Иимэ шэдитэ юумэн үнгэтэ юртэмсымнай юрын байдалда үзэгдэхэл байнал даа.