792
«Ородой Холбоото Уласай хүмүүжүүлэгшэ» гэһэн Бүхэроссиин мэргэжэнги VIII-дахи мүрысөөн ноябриин 7-һоо 12 болотор Рязань хотодо үнгэргэгдэбэ.
Ородой Холбоото Уласай 75 можо нютагуудай хүүгэдэй сэсэрлигүүдэй хүдэлмэрилэгшэд хэмжээ ябуулгада хабаадаба. «Буряад Уласай эрхим хүмүүжүүлэгшэ - 2017» мүрысөөндэ илаһан, 35-дахи «Алые паруса» гэһэн хүүгэдэй сэсэрлигэй хүмүүжүүлэгшэ Ольга Самбуева энэ мүрысөөндэ уласаа түлөөлһэн байна.
Хэдэн үдэрэй туршада «Ородой Холбоото Уласай эрхим хүмүүжүүлэгшэ» мүрысөөнэй түгэсхэлэй шатада хүмүүжүүлэгшэд хабаадажа, мастер-классууд болон үхибүүдээр хамта хэшээлнүүдые үнгэргэһэн байна. Энэ мүрысөөндэ анхан үнгэргэгдэдэгүй байһан хүүгэдэй сэсэрлигүүдэй болбосоролой һалбариин мэргэжэлтэдэй хабаадалгатай хуралдаан үнгэргэгдөө.
Тиихэдэ мүрысөөнэй дүнгүүдээр, «Наадан ба нааданхай» номинацида Буряадай түлөөлэгшэ Ольга Самбуева илаһан байна. Энэ мүрысөөнэй заншалта ёһоор, хабаадагшад Рязань можын хүүгэдэй сэсэрлигүүдтэй танилсажа, Сергей Есенинэй нэрэмжэтэ Гүрэнэй музей-дархан газарта хүрэбэ.
35-дахи хүүгэдэй сэсэрлигэй захирал Наталья Клёнинагай хэлэһээр, Ольга Васильевнада ажалайнгаа дүй дүршэлөөрөө, хэһэн ажалаараа, һанал бодолоороо Ород гүрэнэй хэмжээ ябуулгада хубаалдаха гээшэ шухала байгаа.
Мүрысөөнэй «Хрустальная жемчужина» гэһэн гол шанда Орловско можын хүмүүжүүлэгшэ Дарья Курасова хүртөө.
Ородой Холбоото Уласай Болбосоролой болон эрдэм ухаанай яаман болон Бүхэроссиин болбосоролой профсоюз энэ мүрысөө эмхидхэһэн байна. Тиихэдэ Рязань можын Засагай газар болон Болбосоролой болон эрдэм ухаанай яаманай дэмжэлгээр тус хэмжээ ябуулга үнгэргэгдэбэ. эгэжэ тэмдэглэлтэй.
