739
2017 оной ноябриин 17-до Буряад Уласай Транспортын, элшэ хүсэнэй болон харгын ажахын яаманда 2018 ондо Улаан-Үдэ болон хото шадархи аймагуудта «Аюулгүй, һайн шанартай харгынууд» гэһэн түсэлөөр заһабарилагдаха харгынууд тухай олониитын суглаан үнгэргэгдэбэ.
Энэ хэмжээ ябуулгада Буряад Уласай Транспортын, элшэ хүсэнэй болон харгын ажахын яаманай, «Бурятрегионавтодор», «Улан-Удэстройзаказчик» эмхинүүдэй мэргэжэлтэд, Улаан-Үдын захиргаанай болон хото шадархи аймагуудай харгы барилгын хүтэлбэриин түлөөлэгшэд хабаадаба. Тиихэдэ Улаан-Үдын болон аймагуудай ажаһуугшад энэ суглаанда уригдаһан байна. Тэрэнэй дүнгүүдээр, Буряадай ниислэл хотодо болон аймагуудта 126,9 модоной зайда харгы заһабарилагдаха.
«Аюулгүй, һайн шанартай харгынууд» гэһэн Ородой Холбоото Уласай Юрэнхылэгшын түсэлдэ Буряад Улас 2017 ондо ороһон байна гэжэ һануулнабди. 2025 он болотор жэл бүри Улаан-Үдын болон хото шадархи аймагуудай харгы заһабарилгада 1,250 сая түхэриг мүнгэн гаргашалагдаха (тэрэнэй тоодо 625,0 сая түхэриг федеральна һанһаа һомологдохо, нүгөө 625,0 сая түхэриг баһал хубаагдана: уласай һанһаа 591,6 сая түхэриг, аймагуудай бюджетһээ 33,4 сая түхэриг мүнгэн һомологдохо.)
- 2018 ондо энэ түсэлөөр Байгал шадарай аймагта харгы заһабарилгада 173,4 сая түхэриг һомологдохо, Загарай аймагта – 139 сая түхэриг, Ивалга аймагта – 108 сая түхэриг болон Тарбагатай аймагта – 238 сая түхэриг мүнгэн гаргашалагдаха. Улаан-Үдэдэ «Спиртзаводской тракт», 1905 оной Революциин, Ключевская болон бусад гудамжануудта харгы заһабарилагдаха. Энэ хэрэгтэ 429,6 сая түхэриг мүнгэн гаргашалагдаха, - гэжэ Буряад Уласай Транспортын, элшэ хүсэнэй болон харгын ажахын сайдай орлогшо Алексей Назимов хэлэбэ.
Улаан-Үдэ болон хото шадархи аймагуудай машинын ябаха харгын утань 864 модо болодог юм. Тэрэнэй 317 модониинь харгын нормодо тааруу, энэ хадаа - 36,7% хубинь болоно. 2017 ондо 54 модоной зайда харгы нормативта тааруу болгогдоо, 2018 ондо – 127 модо, 2019-2025 онуудта 335 модоной зайда харгынууд заһабарилагдаха гэжэ түсэблэгдэнэ.
