1048
Агын Буряадай тойрогой Гүнэй нютагта бүхы наһаяа багшын ажалда зорюулһан Валерий Шойжамсоевич ба Светлана Жигжитовна Семёновтоной үнэр баян гэр бүлэ ажаһуудаг юм.
Валерий Семенов ба Светлана Дугаржапова хоёр Шэтын багшын дээдэ һургуулида hуража байхадаа танилсаад, 1974 ондо хуби заяагаа холбоһоор, мүнөө 43 жэл соо суг хамта ан-бун ажаһууна. Залуугаар, оюутан хаһадаа, басаган хүбүүн хоёртой болоһон.
Семёновтоной гэр бүлэ 1977 ондо багшын мэргэжэлэй дипломуудые абажа, Гүнэйн дунда hургуулида ажалайнгаа намтар эхилээ һэн. Светлана Жигжитовна интернадта хүмүүжүүлэгшээр, Валерий Шойжамсоевич физикын багшаар, удаань һургуулиин захиралай орлогшоор хүдэлhэн байна. Эдэ хоёр хурса ухаатай, бэлиг түгэлдэр мэргэжэлтэд болоhоноо олондо харуулжа шадаал даа. 1980 ондо Валерий Шойжамсоевич Ага аймагай Хүнхэрэй hургуулиин захиралаар томилогдоод, гэр бүлэтэеэ энэ нютаг руу зөөгөө бэлэй. Залуу захирал ажал хүдэлмэридөө урган дэбжэжэ, аба эжынгээ захяагай зүб байhые мэдэржэ, харгыhаа халингүй, үнэн сэхэ, үрэжэл ехэтэйгээр ажалаа үргэлжэлүүлhэн юм. Түгэс бэлэдхэлтэй, өөрын хараа бодолтой, ажалаа һайнаар эмхидхэхэ шадабаритай хүтэлбэрилэгшын шэнжэ элиржэ, 1986 ондо Гүнэй нютагайнгаа һургуулиин захиралаар томилогдоод, 25 жэл хүдэлөө.
10 жэлэй туршада Ага аймагай зүблэлэй һунгамал байһан. Удаан сагта нютагайнгаа Дүүмын гэшүүн ябаа, харин 2015 онһоо хойшо Гүнэйн зүблэл түрүүлэгшын ажалые даажа ябана.
Наhанайнгаа амаралтада гараһаншье hаа, манай ахатан гэртээ һууха сүлөө забгүй, ниитын ажалда үдэр һүнигүй ябаһан зандаал даа. Гүнэйн дунда hургуулида нэмэлтэ hуралсалай багшаар хүдэлжэ, үхибүүдтэ шатар заана. Шатарша үхибүүдээ абаад лэ, элдэб хэмжээнэй мүрысөөнүүдтэ ябажал байха. Шабинарынь ехэ амжалтануудые туйладаг. 2016-2017 онуудта Үбэр Байгалай хизаарай болбосоролой ажалай дүнгүүдээр 2-дохи hуури эзэлжэ, ехэ шанда хүртэhэн байна.
Валерий Шойжамсоевич хизаар ороноо шэнжэлдэг юм. Гүнэйн дасанай түүхэ суглуулан бэшэжэ, тэрэнээ сонин, сэтгүүлдэ ниитэлүүлдэг. Хүүгэд болон залуушуулда нютагайнгаа түүхэ, суута зон тухай хөөрэжэ үгэдэг. Ехэ hонюуша, олон юумэ мэдэдэг, тэрэнээ олондо дуулгахые хүсэдэг хүн. Мүнөө дээрээ нютагаймнай аха захатанай нэгэн болоно.
Ажалдаа ехэ амжалта туйлаһанайнгаа түлөө гүрэн түрын хайрада хүртэһэн: «Россиин патриот», «Хүндэлэлэй тэмдэг», «Агын Буряадай тойрогой үмэнэ шэн габьягай түлөө” медальнууд энгэртэнь ялардаг. Мүн олон тоото Хүндэлэлэй грамотануудаар, Баярай бэшэгүүдээр шагнагдаһан, “Багшын ажалай ветеран” нэрэ зэргэтэй.
Валерий Семёнов һүр hүлдэ ехэтэй хүн. Дүрбэн hайхан хүүгэдынь булта дээдэ hургуулитай, ажалай жолоо шанга адхан, гэр бүлэ боложо түбхинэн, абынгаа нэрэ hайнаар нэрлүүлжэ ябана.
Светлана Жигжитовна гурбан басагадтаа гэрэй эзэгтэй (хозяйка) ямар байха ёhотойб гэжэ өөрын жэшээ дээрэ харуулдаг. Шадахагүй юумэниинь үгы гэхэдэ, алдуу болохогүй. Элбэг эдеэ хоолтой, уран гартай, эсхэхэ оёходоо нарин, хүүгэдтээ, аша зээнэртээ дэгэл хубсаһыень, малгай бээлэйень оёhоор лэ байна. Энэ шадабарииень Алла басаганиинь абаhан: үхи хүүгэдтээ мүнөөнэй маягаар аятай тааруугаар оёhон буряад хубсаhаар гоёдог.
Гүнзэгы ухаан бодолтой, номгон даруу зантай, зондоо хүндэтэй байжа, нүхэрэйнгөө ажабайдалайнь бэлэн бэшэ харгыда найдамтай ханинь, түшэг тулгань юм. Светлана Жигжитовна - багшын ажалай ветеран, Ородой Холбоото Уласай болбосоролой хүндэтэ хүдэлмэрилэгшэ, уужам дэлгэр сэдьхэлтэй багша. Наhанайнгаа амаралтада гараашье hаа, Гүнэйн дунда hургуулида тоо бодолгын багшаар хүдэлдэг. Багшалхаhаа гадна, шабинартаяа шэнжэлгын ажал эдэбхитэй ябуулдаг. Агада hүүлэй жэлнүүдтэ буряад хэлэеэ, ёhо заншалаа хамгаалан хүгжөөхэ асуудалда ехэ анхарал хандуулдаг болонхой. Энэ хэрэгтэ Светлана Жигжитовна эдэбхитэйгээр хабаададаг. 2016 ондо зээ басаганиинь хүүхэлдэйнүүдтэ хубсаһа оёод, эрдэм шэнжэлгын хуралдаанда хабаадажа, хоёрдохи hуури эзэлээ. Мүнөө жэл Агын Буряадай тойрогой уран зохёолшодой нэгэдэлэй 70 жэлэй ойн баярта зорюулагдаhан «Буряад хэлэн: түүхэ ба хүгжэлтэ» гэhэн можо нютагууд хоорондын эрдэм шэнжэлгын хуралдаанда «Ононой эрьеын нютагуудай уран шүлэгшэд Онон гол тухай» гэжэ шүлэгэй түүбэри гаргажа танилсуулаад, түрүү hуури эзэлһэн байна.
Гуша гаран жэлэй туршада багшалhан эдэ хоёрой hурагшадай дундаһаа тоолошогүй олон бэрхэ эрдэмтэд, багшанар, эмшэд, экономистнууд, соёлой ажалшад гараа ааб даа. Багшын ажалайнь мэргэжэлые Оюуна басаганиинь үргэлжэлүүлнэ. Оюуна Валерьевна Ким Базарсадаевай нэрэмжэтэ Соёлой hургуулиин хореографиин багшаар олон жэлэй туршада амжалтатай хүдэлнэ. Аюр хүбүүн ба Алла басаганиинь тоо бодолгодо абьяастай һэн тула экономистнууд, одхон басаган Анна сэрэгэй мэргэжэлтэй. Семёновтон 12 аша зээнэртэй. 70 наhандаа дүтэлжэ ябаашье hаа, эдэ хоёрой сүлөөтэй hуухань харагдадаггүй, ниитын бүхы ажалда түрүү зэргэдэ ябадаг.
Бурханай табисуураар, хайра дуранай абтасаар бэе бэеэ оложо, арад зондоо хүндэтэй, Эхэ орондоо туһатай үхи хүүгэдые үндылгэжэ, үнэр баян, олон аша зээнэрэй эхин үндэhэн боложо ябаха гээшэ ёhотойл буянтай юм даа.
Валерий Шойжамсоевич ба Светлана Жигжитовнада, үхи хүүгэдтэнь амгалан байдал, ехэ амжалта, аза талаан хүсэнэбди!
Галина ДОЛГОРОВА, Бадмажаб ГЫНДЫНЦЫРЕНОВ
