965
Буряад Уласай 14 аймагуудай болон Улаан-Үдэ хотын буряад хэлэнэй хорин багшанар «Эрхим багша – 2017» гэһэн мүрысөөндэ хабаадаба.
Ноябриин 24-дэ Буряадай Үндэһэтэнэй 1-дэхи лицей-интернадта мүрысөөндэ хабаадаһан буряад хэлэнэй багшанарые шагналгын баяр ёһолол үнгэргэгдэбэ. Эрхим багшанарые Буряад Уласай Болбосоролой болон эрдэм ухаанай сайд Баир Жалсанов, Арадай Хуралай Можонууд хоорондын холбоонуудай, үндэһэ яһатанай асуудалнуудай, залуушуулай бодолгын, олониитын болон шажан мүргэлэй нэгэдэлнүүдэй талаар хорооной түрүүлэгшэ Цыденжап Батуев, Бүгэдэ Буряадай үндэһэн соёлой эблэлэй гэшүүн Баир Турбянов гэгшэд амаршалба.
- Энэ мүрысөөндэ хабаадагша багшанар хаба шадалаа туршахаһаа гадна, бэе бэетэеэ танилсажа, дүй дүршэлөөрөө хубаалдана. Үнгэрэгшэ жэлдэ бидэ түрүүшынхиеэ уласхоорондын мүрысөө үнгэргэһэн байнабди. Монгол, Хитад гүрэнүүдэй, Үбэр Байгалай хизаарай, Эрхүү можын буряад хэлэнэй багшанар хабаадаһан юм. Тиихэдэ уласхоорондын болон уласай мүрысөөнүүдые ээлжээлэн үнгэргэхэ гэһэн шиидхэбэри абтаа, - гэжэ Буряад Уласай Болбосоролой болон эрдэм ухааанй сайд Баир Жалсанов хэлэбэ.
Буряад хэлэнэй багшанарай уласай VI-дэхи мүрысөөндэ гурбан үдэрэй туршада багшанар ажал тухайгаа хөөрэжэ, харуулжа, мастер-классуудые, нээмэл хэшээлнүүдые үнгэргэһэн байна. Мүрысөөнэй түгэсхэлэй шатада табан эрхим багшанар найруулгануудые бэшэжэ, тэрэнэй дүнгүүдээр Буряадай үндэһэтэнэй 1-дэхи лицей-интернадай багша Цыбигма Лубсанова түрүүлбэ. Цыбигма Лубсановада Буряад Уласай Болбосоролой болон эрдэм ухаанай яаманай тусхай шан «Эрхим багша» гэһэн статуэткэ болон диплом барюулагдаа.
- Мүрысөөн юрэ үнгэрнэ бэшэ, бидэ шэнэ юумэ мэдэхэ болонобди. Намайе дэмжэһэн суг хүдэлдэг багшанарта, мүрысөөндэ суг хабаадааһан багшанарта баяр хүргэнэб, - гэжэ Цыбигма Лубсанова хэлэбэ.
Һайшаалтайнь гэхэдэ, мүнөө жэлэй мүрысөөндэ Буряад Уласай Мухаршэбэр, Багдарино, Турунтаево, Элхи, Сахули, Дээдэ Саянтуй нютагуудай багшанар хабаадаһан байна.
Гран-при шанһаа гадуур, мүрысөөнэй 1-дэхи һуури 29-дэхи гимназиин багша Лхама Цыренова, 2-дохи һуури Хэжэнгэ аймагай Чесаанын дунда һургуулиин багша Соёлма Цыдыпова, 3-дахи һуури Улаан-Үдын 32-дохи болон 52-дохи һургуулинуудай багшанар Баярма Лыгденова болон Светлана Ломбоева гэгшэд эзэлбэ.
Буряад Уласай Болбосоролой болон эрдэм ухаанай яаман «Эрхим багша» гэһэн мүрысөө үнгэргэдэг. 2018 ондо буряад хэлэнэй багшанарай уласхоорондын мүрысөөн эмхидхэгдэхэ гэжэ Баир Жалсанов тэмдэглэбэ.
Буряад Уласай Болбосоролой болон эрдэм ухаанай сайтһаа гэрэл зураг абтаба.
