847
Буряад Уласай Болбосоролой болон эрдэм ухаанай сайд Баир Жалсанов болон Яруунай аймагай нютагай засагай байгууламжын гулваа Цыденжап Шагдаров гэгшэд һургуули ашаглалгада тушаалгын баяр ёһололдо хабаадаба. Тэдэнэр багшанар, һурагшад, түрэлхидые амаршалба.
- Үльдэргэ нютагай ажаһуугшад ехэ эдэбхитэй зон гэжэ хэлэхэ хэрэгтэй. Һургуули дүүргэгшэдэй аша туһаар, аймагай захиргаанай дэмжэлгээр һургуулида халуун эдеэ бариха болон хоёр байшан холбоһон дулаан залгалаа богони сагта баригдаһан байна, - гэжэ Баир Жалсанов хэлэбэ.
Таба һарын туршада һургуулиин хушалта, үүдэнүүд, сонхонууд, үмхирһэн хананууд, уһаар, дулаагаар, зайн галаар хангалгын соргонууд шэнэлэгдэжэ, түймэрэй гараһан тухай дуулгаха дохёо тохогдоо. Бүхы байшанда шэрдэлгэ, будалгын ажалнууд хэгдэһэн байна. «Ородой Холбоото Уласай можо нютагуудта болбосоролой эмхинүүдтэ шэнэ һууринуудые байгуулгада дэмжэлгэ» гэһэн федеральна программын хэмжээндэ һургуули заһабарилгада 10 сая түхэриг мүнгэн һомологдоо. Тиихэдэ тамирай заал заһабарилгада бэеын тамир болон спорт хүдөө нютагуудай һургуулинуудта заалга гэһэн түсэлөөр гарбан сая түхэриг гаргашалагдаһан байна.
Заһабарилгын ажалнуудай үедэ үхибүүд эхин классуудай байшан болон мастерскойдо һуралсалаа таһалдуулангүй үргэлжэлүүлээ.
- Һурагшад дулаан байшанда һуража, мүнөө үеын эрилтэнүүдтэ таараһан тамирай байшанда бэеэ һорихо аргатай болобо, - гэжэ һургуулиин захирал Амгалан Цырендылыков хэлэбэ.
2017 ондо Буряад Уласай 28 һургуулинуудые заһабарилгада 386,6 сая түхэриг федеральна һанһаа һомологдоо. Ивалга аймагай 2-дохи һургуули заһабарилгада уласай һанһаа 29 сая түхэриг гаргашалагдаа гэжэ Буряад Уласай Болбосоролой болон эрдэм ухаанай яаманда мэдээсэнэ.
Мэдээсэл:
Үльдэргын дунда һургуули 1922 ондо байгуулагдаһан. Энэ һургуули РСФСР-эй габьяата багша, Социалис ажалай Герой, мэдээжэ уран зохёолшо Ц.Н. Номтоевой нэрэмжэтэ юм. Һургуулиин шэнэ байшан 1964 баригдаа. Мүнөө Үльдэргын дунда һургуулида 112 үхибүүд һурана.
Буряад Уласай Болбосоролой болон эрдэм ухаанай яаманай сайтһаа гэрэл зураг абтаба.
