855
Һаяхана Суулга һууринда Эсэгэ ороноо хамгаалгын Агууехэ дайнай ветеран Даша Мункуевич Цыреновэй дурасхаалда зорюулагдаһан шатараар Мухар-Шэбэр аймагай нээмэл мүрысөөн эмхидхэгдээ.
Даша Мункуевич Зандин нютагһаа гарбалтай. Тэрэ олон тоото орден болон медаляар шагнагдаһан, Хойто Байгалай аймагай хүндэтэ эрхэтэн юм. Зүблэлтэ үеын, намай элитэ хүтэлбэрилэгшэ байһан, Буряадһаа гарбалтай Советскэ Союзай геройнууд тухай ном бэшэһэн. КПСС-эй можын хорооной намай архив даагшын тушаалһаа наһанайнгаа амаралтада гараһан.
Суулгын дунда һургуулида эмхидхэгдэһэн шатарай һайндэр үндэр хэмжээндэ үнгэргэгдөө гэжэ тэмдэглэхэ хэрэгтэй. Буряад Уласай Арадай Хуралай һунгамал Баир Цыреновэй мүнгэн дэмжэлгын ашаар энэ хэрэг бүтөө юм. Аймагаймнай ажаһуугшад, эмхидхэлэй хороон, мүрысөөндэ хабаадагшад баяр баясхалангаа мэдүүлнэ.
Арадай Хуралай Түрүүлэгшын орлогшо, Буряадай шатарай федерациин юрэнхылэгшэ В.Г.Ирильдеевэй онсолһоор, манай мүрысөөн уласай мүрысөөнүүдэй тобьёгто оруулагдаа, тиимэһээ бидэ шатараар зэргэнүүдые олгохо эрхэтэйбди.
Мүрысөөн 3 бүлэгөөр үнгэргэгдөө. Эрэшүүлэй бүлэгтэ Батор Жигмитдоржиев (“Боомой” СП), Мэргэн Ванданов (Улаан-Үдын 45-дахи һургуули), Игнат Батомункуев (“Суулгын” СП) гэгшэд удаа дараалан, шангай һууринуудые эзэлээ.
Хүбүүдэй дунда Улаан-Үдын 45-дахи һургуулиин һурагша Мэргэн Ванданов илалта туйлаа. Удаадахи һууринуудые Улаан-Үдын 32-дохи һургуулиин Тумэн Дугаров болон Галтайн дунда һургуулиин Цыбик Бальжинимаев эзэлээ.
Басагад сооһоо Галтайн һургуулиин Баярма Чернинова шалгараа. Мухар-Шэбэрэй 2-дохи дунда һургуулиин Сарюна Дашанимаева 2-дохи һуури эзэлээ, Суулгын һургуулиин һурагша Арина Дардаева гурбадахи болоо.
Мэргэн Ванданов мүрысөөнэй эрхим шатаршан гэжэ тодороо.
Бүхы илагшадта ба шангай һууринуудые эзэлэгшэдтэ үнэтэ бэлэгүүд, медальнууд ба Буряадай Тамирай хорооной грамотанууд барюулагдаа.
Гадна 70 наһаяа холо алхаад ябаһан тамирай ветеранууд М.Ш.Ишигеева (Суулга) ба Б.Б.Санжиева (Боом) гэгшэд шагнагдаа юм.
Тиихэдэ шатар наада хүгжөөлгэдэ, тус мүрысөө эмхидхэлгэдэ горитой хубитаяа оруулһан Данзан Дабибалович Дугаровта, эдэбхитэйгээр мүрысөөндэ хабаадаһан һурагшадай һургуулинуудай захиралнуудта – М.В.Дардаевада (Суулгын һургуули), Ч.Н.Цырендоржинда (Галтайн һургуули), А.Н.Аюшеевтэ (Хонхолын һургуули), мүн тиихэдэ Суулгын һургуулиин захиралай һуралсалай талаар орлогшо Л.Б.Дугаровада Арадай Хуралай Баярай бэшэгүүд барюулагдаа.
Суулгын һургуулиин захиралай хүмүүжүүлгын талаар орлогшо О.В.Сизыхтэ, физкультурын багша Э.Ю.Сизыхтэ энэ һайндэр үнгэргэлгэдэ эдэбхитэйгээр хабаадаһанайнь түлөө баяраа мэдүүлнэб.
Д.ДУГАРОВ, Суулгын Ветерануудай зүблэлэй түрүүлэгшэ, Ородой Холбоото Уласай бэе махабадай соёлой ба тамирай отличник
